د ځواکمنو مېرمنو غورځنګ: ښایي ټرمپ له تېر څخه زده‌کړه کړې وي او دا ځل سخت دریځ خپل کړي

دغه غورځنګ د یوې خبرپاڼې په خپرولو سره ویلي، چې ټرمپ تر دې وړاندې د دوحې تړون او له افغانستانه د امریکایي سرتېرو په اېستنه کې په دغه هېواد کې یې پراخو بدلونونو ته لاره هواره کړه.
په دغې خبرپاڼه کې راغلي، د افغانستان اوسني وضعیت ته په کتو ښایي ټرمپ دا ځلې د تېر پرتله یوه بېله تګلاره خپله کړي.
خبرپاڼه کاږي:« ښایي ټرمپ له تېر څخه زده‌کړه کړې وي او دا ځل سخت دریځ خپل کړي.»
خبرپاڼه زیاتوي، چې کېدای شي ټرمپ دا ځلې د مقاومت او د طالبانو پر ضد له بېلابېلو جبهو ملاتړ وکړي او پر طالبانو فشارونه زیات کړي.
خبرپاڼې وړاندې کاږلي، چې ښایي د ټرمپ په راستنېدو پر پاکستان یو ځلې بیا فشارونه زیات کړي او ان پر دغه هېواد مالي مرستې هم بندې کړي او له سیاسي او اقتصادي فشارونو سره پاکستان اړ باسي، چې د طالبانو له ملاتړه لاس پر سر شي.
د خبرپاڼې له مخې، که طالبان د نړۍوالې ټولنې د غوښتنو پر وړاندې مقاومت ته دوام ورکړي او په افغانستان کې سخت قوانین پلي کړي، ښايي ټرمپ له سختو بندیزونو سره طالبان له مالي پلوه کمزوري کړي. دا بندیزونه کولای شي مالي سرچینو او نړۍوال ملاتړ ته د طالبانو لاسرسی محدود کړي.