ناټو پوځي کمېټې رییس: د اوکراین او افغانستان جګړه فرق کوي ځکه طالبانو اتومي وسلې نه درلودې
د ناټو د پوځي کمېټې ییس وايي چې که روسیې اتومي وسلې نه درلودای، د دغه سازمان ځواکونه به اوس له روسیې سره په اوکراین کې په جګړه بوخت وای.
د ناټو د پوځي کمېټې ییس وايي چې که روسیې اتومي وسلې نه درلودای، د دغه سازمان ځواکونه به اوس له روسیې سره په اوکراین کې په جګړه بوخت وای.
سمندر مشر راب باویر د چک جمهوریت په پلازمېنه کې پراګ کې له یوې دفاعي غونډې وروسته وویل « پوره ډاډه یم چې که روسیې اتومي وسلې نه درلودای، موږ به په اوکراین کې وای او هغوی به مو اېستلي وای».
روسیه تر متحده ایالتونو وروسته داتومي وسلو تر ټولو سترې زېرمې لري.
د امریکا او مسکو اتومي زیرمې د نړۍد اتومی وسلو شاوخوا ۹۰ سلنه برخه جوړوي.
د روسیې ولسمشر ولادیمیر پوتین د روان کال په مارچ میاشت کې وویل، چې مسکو له پوځي اړخه سمبال او اتومي جګړې لپاره چمتو دی.
د نیوزویک د رپوټ له مخې، باویر د افغانستان او اوکراین د جګړې پرتلنه وکړه او ویې ویل، چې افغانستان کې [د ناټو] جګړه له اوکراین [روسیې له جګړې] سره توپیر کوي، ځکه طالبانو هلته اتومي وسلې نه درلودې.
د ناټو دغه جګپوړي قوماندان په اوکراین کې د جګړې پای ته رسولو په تړاو د ډونالډ ټرمپ احتمالي پلانونو ته په اشارې وايي، « زه نه غواړم د ټرمپ د نوې ادارې د وړاندیزونو په اړه خبرې وکړم، مهمه داده چې د هغه د ویل شویو خبرو پر بنسټ نتیجه ګیري ونه کړو».
په پراګ کې دغه دفاعي درې ورځنۍ ناسته «د ستراتیژیکو څیړنو» د نړیوالې موسسې په کوربه توب جوړه شوې ده.
