طالبانو هند ته درې نور ډېپلوماټان معرفي کړي

په کابل او هند کې د افغانستان د ډېپلوماتیکو سرچینو نن دوشنبې «د لړم۲۱مه» وویل چې د طالبانو له خوا درې تنه ډېپلووماټان ۱۴ ورځې وړاندې معرفي شوي دي.

په کابل کې د طالبانو سرچینې وايي چې دوی درې تنه ډېپلوماټان معرفي کړي خو دوی په تمه دي، چې د هند حکومت په دې اړه اقدام وکړي او د طالبانو تازه معرفي شوي ډېپلوماټ ومني.

په قطر کې د طالبانو د سیاسي دفتر مشر سهیل شاهین زوی نجیب شاهین اوس مهال د طالبانو تر واک ولاندې بهرنیو چارو وزارت کې دنده لري.

د طالبانو د بهرنیو چارو وزارت له خوا معرفي درې تنه ډېپلوماټان ټول طالبانو غړي دي او په بهرنیو چارو وزارت کې کومه کاري سابقه نه لري.

په هند کې د افغانستان ډېپلوماتیکي سرچینو افغانستان انټرنشنل ته وویل چې هندوستان به ډېر ژر د طالبانو درې تنه معرفي شوي ډېپلوماټان ومني.

د رارسېدو معلوماتو په بنسټ اوس مهال یوازې د هند په حیدراباد ښار کې د افغانستان کونسلګرۍ کې یوه سابقداره ډېپلوماټ سید محمد ابراهیمخېل پر دنده دی او نور پخواني د جمهوریت ډېپلوماټان له هندوستان څخه وتلي دي.

په هند کې سرچینې وايي د طالبانو له لوري معرفی شوی ډېپلوماټ اکرام الدین کمیل د هند ممبۍ ښار کې د افغانستان په کونسلکرۍ کې عملا کار پیل کړی دی او ټول واک یې په خپل لاس کې اخیستی دی.

100%

د سنډې ګارډین په یوه راپور کې چې د یکشنبې په ورځ خپور شو، ویل شوي چې نوی ډیلی په پام کې لري له طالبانو سره د ډېپلوماتیکو اړیکو د پراخولو په برخه کې د یوه مهم ګام په توګه په هند کې د دې ډلې استازی ومني.

د سنډې ګارډین ورځپاڼې د راپور له مخې، طالبانو اکرام الدین کامل ته په ممبی کې د افغانستان په کونسلګرۍ کې د دویم سکرتر دنده په پام کې نیولې ده.

په هندوستان کې د سفارت ترڅنګ دوه کونسلګرۍ په ممبۍ او حیدراباد ښارونو کې فعالیت لري.

څو ورځې وړاندې کابل ته د هند د بهرنیو چارو وزارت د افغانستان، پاکستان او ایران د برخې د مشر جې پي سینګ وروستی سفر له طالبانو سره د نوي ډیلي د اړیکو د مخ پر ودې پرمختګونو ښکارندویي کوي.

په دې وروستیو ورځو کې جي پي سنګ او د طالبانو د دفاع او بهرنیو چارو وزیرانو په کابل کې جلا جلا کتنې وکړې چې د دوه اړخیزو اړیکو پر پراختیا یې ټینګار کړی.

د طالبانو د نوي ډ‌ېپلوماټانو د منلو او یا هم د نه منلو په اړه تروسه هندي چارواکو څه نه دي ویلي.