ټرمپ، جمهوري غوښتونکې قانون جوړونکې لوري چاوز درمر د امریکا د کار د وزېرې په توګه ونوموله
ډونالد ټرمپ ویلي، چې د امریکا د استازو جرګې جمهوري غوښتونکې غړې لوري چاوز درمر یې د امریکا د کار د وزېرې په توګه نومولې ده.
ډونالد ټرمپ ویلي، چې د امریکا د استازو جرګې جمهوري غوښتونکې غړې لوري چاوز درمر یې د امریکا د کار د وزېرې په توګه نومولې ده.
ښاغلي ټرمپ هیله څرګنده کړې، چې د نوموړې ټاکنه به په امریکا کې د کاري فرصتونو په پیدا کولو کې ګټوره تمامه شي.
د مسلکي زدهکړو لپاره د فرصتونو برابرول، د ورځینیو عایداتو ډېرېدل، په کاري شرایطو کې د اسانتیاو رامنځته کول او امریکا ته د کاري فرصتونو بیا ستنول هغه څه دي چې ښاغلی ټرمپ یې د لوري چاوز درمر څخه تمه کوي.
د پاکستان د تحریک انصاف ګوند (د نومبر د ۲۴مې نېټې) احتجاج لپاره د مرکزي او پنجاب حکومتونو لهخوا سخت امنیتي تدابیر نیول شوي دي.
د تحریک انصاف مشر او پخواني لومړي وزیر عمران خان خپلو پلویانو ته د یکشنبې په ورځ اسلام اباد ته د احتجاج او لاریون کولو بلنه ورکړې.
د پاکستان د کورنیو چارو وزیر محسن نقوي په وینا، د نومبر په ۲۴مه به په اسلام اباد کې مخابراتي شبکې هم غیرفعاله شي.
د دغه احتجاج له امله لويې لارې او اسلام اباد ته ورغلې ټولې لارې د کانټینرونو په اېښودلو سره تړل شوې دي.
په اسلام اباد کې چارواکو د جمعې په ورځ د ماښام له اتو بجو څخه د پلازمینې د ټولو مټرو بسونو فعالیت هم وځنډاوه.
پولیس وایي، چې قهرجن اعتراض کوونکي د امن او نظم د ګډوډولو او شخصي او حکومتي ودانیو ته د زيان رسولو پلان لري.
د پاکستان د کورنیو چارو وزیر محسن نقوي وایي، چې پيټيای ته د احتجاج او پرلت اجازه نه ده ورکړل شوې.
هغه ويلي، چې د اسلام اباد سترې محکمې د حکم له مخې په پلازمينه کې د احتجاج او پرلت اجازه نه شته.
هغه زیاته کړه:« موږ د قانون له مخې د قانون د پلي کولو پابند يو او د سترې محکمې له حکم وروسته به د محکمې حکم سل په سلو کې عملي کړو.»
د خیبر پښتونخوا له کورمې څخه خبریالان وایي، د تېرې ورځې له لاریون وروسته د دوو مذهبي ډلو تر منځ په روان اخ و ډب کې تر دې مهاله ۱۸ کسه وژل شوي او د ۳۰ په شاوخوا کې کسان ټپیان شوي دي.
له پاړه چناره سیمهییز خبریال علي افضل افضال افغانستان انټرنشنل پښتو ته وویل، چې دا مهال هم د کورمې ولسوالۍ د علیزیو او باغان قومونو تر منځ درنه جګړه روانه ده او دواړه خواوې د یو بل پر ضد له سپکو او درنو وسلو څخه کار اخلي.
دغه نښتې د تېرې ورځې په پېښه کې د وژل شویو کسانو د جنازو له ادا کولو وروسته پیل شوې، چې له امله یې په بازارونو کې ځینو دوکانونو، د تېلو پمپ سټیشنونو او استوګنځایونو ته اورونه اچول شوي دي.
سر چېنې وایي، له ډېرو سیمو څخه خلک تېښتې ته اړ شوي او ځانونه یې خوندي سیمو ته رسولي دي.
دغه نښته د پنجشنبې د ورځې وروسته کېږي، چې هلته د تازه شمېرو له مخې د ښځو او ماشومانو په ګډون ۴۵ کسه په یو وسلهوال برید کې وژل شوي وو.
په کورمه کې ځایي خبریالان وایي، چې په سیمه کې حالات ډېر ترینکلي دي او د دوی په خبره چې ښایي د دغې روانې جګړې لمبې نورې سیمو ته هم خورې شي.
د تحریک طالبان پاکستان ډله (ټيټيپي) وایي، د خیبر پښتونخوا د کورمې ولسوالۍ مرګوني پېښه د دغې ډلې او نورو وسلهوالو ډلو کار نه دی؛ بلکې په خبره یې په یاده پېښه کې نېغ په نېغه د پاکستان پوځ ښکېل دی.
د دغې ډلې ویاند محمد خراساني بېګاه ناوخته د یوې خبرپاڼې په خپرولو سره د کورمې ولسوالۍ پېښه غندلې، پر هغې یې خواشیني ښودلې او په پېښه کې یې د خپلې ډلې لاس لرل رد کړي دي.
په خبرپاڼه کې چې یوه کاپي یې افغانستان انټرنشنل ته هم رسېدلې یادونه شوې، چې دغې ډلې د پېښې په هماغې لومړۍ ورځ هم په دغې ډلهایزې وژنه کې د خپلې ډلې لاس لرل رد کړي و؛ خو د دوی په خبره د استخباراتي کړیو سره ځینو تړلو رسنیو د پړې ګوته دغې ډلې ته نېولې ده.
په خبرپاڼه کې راغلي، چې په کورمې ولسوالۍ کې د سوني او شیعه مذهبو تر منځ د تاوتریخوالي پېښې د ټيټيپي د رامنځټه کېدو څخه پخوانۍ مخینه لري چې تر ډېره په کې پاکستانی پوځ او استخباراتي کړۍ ښکېلې دي.
خبرپاڼه په کورمې ولسوالۍ کې له مېشتو سیاسي ګوندونو او قومي مخورو غوښتنه کوي، چې دغه پېښه دې په هر اړخیزه توګه وڅېړي او داسې یوه جرګه دې جوړه کړي چې د ټولو مېشتو قومونو لپاره د منلو وړ وي.
د خبرپاڼې په لیکنه که دغسې قومي جرګې د مسلې د حل لپاره په وخت سره ګام وانخلي؛ نو په سیمه کې به مذهبي تاوتریخوالی نور هم زور واخلي، چې بیا یې کابو کول ستونزمن څه چې ناشونی به هم شي.
د خیبر پښتونخوا په کورمې ولسوالۍ کې د پنجشنبې په ورځ د (لیندۍ په لومړۍ نېټه) د شیعه مذهبو په موټریز کاروان چې له پاړه چناره پېښور ته په لاره و، وسلهوال برید وشو، چې له امله یې د ښځو او ماشومانو په ګډون ۴۴ کسان ووژل شول او شاوخوا همدومره نور ټپیان شوي وو.
د دغې پېښې مسووليت تر اوسه کومې ډلې پر غاړه نه دی اخيستی؛ خو په کورمې ولسوالۍ کې له ډېر وخت راهیسې د شيعه او سوني مذهبو تر منځ جګړه روانه ده، چې له دواړو لوريو په کې تر اوسه د سر او مال درانه زیانونه اوښتي دي.
دغلته ناامني او د بې ګناه وګړو دوژلو تر شا ځايي خلک هم د سترې استخباراتي کړۍ ښکېلې بولي.
ملګري ملتونه وایي، ۲۰۲۴ زېږدېز کال د مرستندویانو لپاره مرګونی ګال و چې په دغه کال کې د نړۍ په بېلابېلو برخو کې ۲۸۱ مرستندویان وژل شوي دي.
دغه سازمان د مرستندویانو پر خوندیتوب ټینګار کړی او ویلي یې دي، چې دغه وژنې په افغانستان، غزه، اوکراین او یمن کې رپوټ شوې دي.
د بشري چارو او بېړنیو مرستو د همغږۍ په برخو کې د دغه سازمان نوي مرستیال ټام فلچر، ویلي:« مرستندویه کارکوونکي په بې مخینې توګه او په ډېرې چټکتیا سره وژل کېږي. د هغوی زړورتیا او انسانیت د مرمیو او بمونو قرباني کېږي.»
نوموړی په ټینګار سره له دولتونو او په جګړه کې له ښکېلو غاړو غوښتنه کوي، چې د مرستندویانو په خوندیتوب کې دې نړۍوال قوانین په پام کې ونیسي او د مرستندویانو قاتلین دې عدالت ته راکاږي.
د ملګرو ملتونو د شمېرو له مخې، په ۲۰۲۳ کال کې د وژل شویو مرستندویانو شمېر په څه د پاسه شلو هېوادونو کې ۲۸۰ کسو ته رسېدلی و.
په غزه کې روانه جګړه چې تېرکال د اکټوبر په اوومه نېټه ونښته د مرستندویانو د وژل کېدو د ډېرېدو اصلي لامل بلل کېږي.
د دغو شمېرو له مخې، په غزه کې د حماس او اسراییل د جګړو له پیل راهیسې تر دې دمه ۳۳۳ مرستندویان وژل شوي دي.
راپورونه ښيي، چې یوازې په روانه میاشت کې ۱۰ تنه ملي کارکوونکي په غزه کې وژل شوي دي.
د ملګرو ملتونو د بشري مرستو د همغږۍ د برخې ویاند ینس لارکه وویل: «دغه شمېرې به له شک پرته د بشري ټولنې په تېره بیا پر هغو کسانو چې د جګړې په لومړۍ کرښو کې کار کوي ناوړه اغېز وکړي او هغوی به اندېښمن کړي.»
هغه زیاته کړه: «د مرستندویانو لپاره ګواښونه یوازې په غزه کې نه؛ بلکې د نړۍ په نورو هېوادونو لکه افغانستان، د کانګو په ډیموکراتیک جمهوریت، سویلي سوډان، اوکراین او یمن کې هم د تاوتریخوالي له امله انسان تښتونې، ځورونې او خپلسري نېونې هغه څه دي، چې د مرستندویانو په چارو کې یې خنډونه جوړ کړي دي.»
د دغو ننګونو تر څنګ، مرستندویه سازمانونه لا هم د بشري مرستو په رسولو کې خپلو چارو ته دوام ورکوي او تېر کال یې د ۱۴۴ مېلیونو هغو خلکو لاسنیوی کړی، چې بشري مرستو ته اړمن وو.
د سایټ استخباراتو ډلې د جمعې په ورځ وویل، چې د روسیې د واګنر شخصي پوځي قراردادي کمپنۍ لږترلږه اوه جنګیالي په مرکزي مالي کې په یو برید کې وژل شوي دي. د دغه برید مسوولیت په شمالي افریقا کې د القاعدې سره د یوې تړلې ډلې له خوا پر غاړه اخیستل شوی دی.
له دې مخکې، واګنر د جولای په میاشت کې د الجزایر سره د مالي پولې ته نږدې د تواریګ وسله والو او اسلامپالو سره په جګړه کې درانه زیانونه لیدلي وو.
مالي او د هغې ګاونډیان بورکینا فاسو او نایجر د بېلتون غوښتونکو او د اسلامي دولت او القاعدې ځواکمنې څانګې د کنټرول د مخنیوي لپاره مبارزه کوي، کوم چې په تېرو ۱۲ کلونو کې یې په دغه منطقه کې پراخې سیمې نیولي دي.
سایټ استخباراتي ډله، چې په سیمه کې د افراطي فعالیتونو څارنه کوي، په یوه اعلامیه کې وایی، چې د القاعدې سره تړلې JNIM ډلې د هغه برید مسولیت په غاړه اخیستی چې د پنجشنبې په ورځ ترسره شو.
د مالیې د پوځ ویاند د رویټرز سره خبرو ته نه دی حاضر شوی.
د مالي د پوځ یوې سرچینې ویلي، چې هغه د روسي جنګیالیو په ګډون اوه مړي لیدلي، په داسې حال کې چې دوو سیمه ییزو مدیرانو برید تایید کړی. یوه یې وویل، چې پنځه د واګنر جنګیالي وژل شوي.
په سیمه یو امنیتي سلاکار وویل، چې برید د کاتیبا ماکینا په نوم د JNIM یوې څانګې له خوا ترسره شوی او لږترلږه شپږ روسان پکې وژل شوي دي.
