د ګډ امنیتي تړون سازمان سرمنشي وايي، په افغانستان کې لا هم د پام وړ ترهګرې ډلې فعالې دي. ایمانقلي تسماګمباتوف په افغانستان کې د ترهګرو فعالیتونه یوه جدي ستونزه وبلله او ویې ویل چې د تاجکستان او افغانستان ترمنځ د پولې د ټینګولو پلان به د لیندۍ په اتمه تصویب شي.
هغه د بیلاروس له اېس ټيوي سره په مرکه کې وویل: «د ډلهییز امنیت تړون سازمان به د نومبر په ۲۸مه (لیندۍ اتمه) په استانه کې په یوه غونډه کې له افغانستان سره د تاجکستان د پولو د ټینګولو پلان تصویب کړي.»
ایمانقلي تسماګامباتوف د دغه پلان تصویب د ډلهییز امنیت د تړون د غړو هېوادونو تر منځ د یو هدفمند پروګرام په توګه ګڼلی دی.
روسیه، بیلاروس، ارمنستان، قزاقستان، قرغزستان او تاجکستان د ډله ییز امنیتي تړون سازمان غړي دي.
ایمانقلي تسماګامباتوف د افغانستان وضعیت د منځنۍ اسیا لپاره د اندېښنې وړ بللی او ویلي یې دي، چې له افغانستان سره د تاجکستان د پولو د ټینګولو د پروګرام تصویب به د ډلهییز امنیت د تړون غړو هېوادونو ته اجازه ورکړي چې په ګډه د منځنۍ اسیا د هېوادونو امنیت ډاډه کړي.
د ډلهییز امنیتي تړون سازمان په تیرو درېیو کلونو کې په وار وار د افغانستان د امنیتي وضعیت په اړه اندیښنه ښودلې او افغانستان ته نږدې په تاجکستان کې یې څو ځلې پوځي تمرینونه کړي دي.
د ۲۰۲۲ کال په جنورۍ کې د تاجکستان ولسمشر امام علي رحمان د افغانستان په شاوخوا کې د امنیتي کمربند د جوړولو پلان اعلان کړ.
