پاکستاني رسنۍ: په کورمه کې د اوربند سربېره نښتې روانې دي
د خراسان ډایري په نوم یوه پاکستاني رسنۍ وايي، چې د خیبر پښتونخوا په کورمه ولسوالۍ کې د اوربند سربېره د شعیه او سوني وګړو ترمنځ درنې نښتې روانې دي.
د خراسان ډایري په نوم یوه پاکستاني رسنۍ وايي، چې د خیبر پښتونخوا په کورمه ولسوالۍ کې د اوربند سربېره د شعیه او سوني وګړو ترمنځ درنې نښتې روانې دي.
د دغې رسنۍ د راپور له مخې، د خیبر پښتونخوا ایالت رسمي شمېرې ښيي، چې په دغو نښتو کې ۸۸ کسان وژل شوي او ۱۰۹ نور ټپیان دي.
پاکستاني کارپوهان وايي، چې په دغه سیمه کې نښتې له شپږو میاشتو راهیسې روانې دي او د حکومت سیاسیون او پوځ د دغو نښتو د مخنیوي اراده نه لري، بلکې پرې خوشحاله دي.
په همدې حال کې، تحریک طالبان پاکستان د یوې اعلامیې په ترڅ کې ویلي چې د پاکستان استخباراتي ادارې د خپلې ماتې پټولو لپاره غواړي په کورمه کې ځايي اوسېدونکي په خپلو کې سره وجنګوي.
ټي ټي پي د پاکستان پوځ ته په اشارې سره وايي، چې ډېر ژر به یې له دې خاورې وباسي او پاکستان به د سولې ټاټوبی وګرځوي.
د عمران خان مېرمن بشرا بي بي د پاکستان تحریک انصاف ګوند پلویانو ته په وینا کې وویل، چې لاریونونه به تر هغه وخته روان وي، چې عمران خان له زندانه نه وي راخوشې شوی. هغې په لاریونونو کې د ګډون لپاره له خلکو د ملاتړ غوښتنه هم وکړه.
د پاکستان د پخواني لومړي وزیر عمران خان د ګوند غړي او پلویان په سختو امنیتي تدابیرو سربېره د اسلام اباد «ډي چوک» ته د رسېدو په هڅه کې دي.
اسلام اباد ته د پاکستان له بېلابېلو سیمو څخه د زرګونو لاریونیو د کاروانونو د مخنیوي په موخه ټولې لارې او سړکونه د پولیسو له لوري تړل شوي دي.
د دغو لاریونیو سره د عمران خان مېرمن بشرا بي بي هم ملتیا کوي.
بشرا بي بي اسلام اباد ته نږدي پر موټروې د هزاره انټرچینج په سیمه کې د تحریک انصاف ګوند پلویانو ته په وینا کې وویل، چې «تر څو چې عمران خان له موږ سره نه وي یو ځای شوی، تر هغو به لاریونونه روان ولري.»
نوموړې زیاته کړه: «زما بچیانو او زما وروڼو، تر څو چې خان له موږ سره نه وي یو ځای شوی، موږ به تر هغو پورې دغه لاریونونه نه ختموو، زه خپله تر وروستیو سګلیو په لاریون کې دریږم.»
د ښاغلي خان مېرمن وايي، زما د خاوند لپاره نه بلکي د هېواد د مشر لپاره دې د نوموړي ملاتړ وکړي.
بشرا بي بي وویل: «تاسو زما ملاتړ وکړئ، که څوک ملاتړ هم نه کوي بیا هم زه مبارزه کوم. دا یوازي زما د خاوند مسله نه ده، بلکې د دغه هېواد د رهبر مسله ده. او زه دا باور لرم چې پښتانه غیرتي قوم دی او تر اخیره موږ یوازې نه پریږدي.»
بل خوا نن سهار د اسلام اباد اړوند د ټېسکلا د پولیسو په مرکز کې د د عمران خان، د نوموړي د مېرمنې بشرا بي بي، د هغې د خور علیمه خان او د خیبر پښتونخوا د مشر وزیر علي امین ګنډاپور او د ګوند پر یو شمیر نورو غړو د ترهګرۍ ضد قصیې ثبتې شوې دي.
له زندان څخه د عمران خان د راخوشې کېدو په موخه د تحریک انصاف ګوند پلویانو د تېرې ورځې راهیسې لاریونونه پیل کړي دي.
حکومت اسلام اباد ته د لاریونوالو د ننوتلو د مخنیوي په موخه ټولې لارې او سړکونه بند کړي او په اسلام اباد او شاوخوا سیمو کې یې د عمران خان لسګونه پلویان نیولي او بندیان کړي دي.
د پاکستان د دفاع وزیر خواجه اصف ویلي، چې له تحریک انصاف سره به نور مذاکرات نه کوي. دغه پاکستاني چارواکي ویلي، چې اسلام اباد ته د تحریک انصاف ګوند د کاروانونو په راتګ کې کومه ستونزه نه لري خو د امن ګډوډونکو مخه به نیسي.
د پاکستان تحریک انصاف ګوند لکونه غړي او پلویان د دغه هیواد له بیلابیلو سیمو څخه تیره ورځ یکشنبه د اسلام اباد په لور د اعتراضي لاریون کولو په موخه خوځېدلي او نن دوشنبه د اسلام اباد څنډو ته رسیدلي دي.
د پاکستان د دفاع وزير خواجه اصف اسلام اباد کې له رسنیو سره په کې ويلي، چې د ټوپک په زور له هيچا سره خبرې اترې نه کوي.
هغه وايي، له دې وروسته د عمران خان له ګوند سره هیڅ ډول خبرې اترې نه کوي.
خواجه اصف وویل چې د اسلام اباد په لور د کاروانونو په راتګ کې کومه ستونزه نه لري. او وايي چې، علي امين ګنډاپور مخکې هم راغلى و او اوس بیا اسلام اباد ته پر لاره دی.
ښاغلي اصف په کورمه کې د وروستیو ناکراریو له امله د خیبرپښتونخوا سر وزیر علي امین ګنډاپور ته په اشارې وويل «څوک چې د صوبې خلکو ته انصاف نه شي ورکولی هغه به مذاکرات څنګه وکړای شي؟ د قانون او نظم رامنځته کول د صوبايي حکومت دنده ده.»
خواجه اصف وویل چې د علي امین ګنډاپور په څیر خلک هیڅ د اعتبار وړ نه دي.
د تحریک انصاف ګوند غړو تر دې وړاندې ویلي وو، چې د نومبر په ۲۴م به په اسلام اباد کې د عمران خان د خوشې کېدو په موخه اعتراضي لاریون کوي او تر هغه به بیرته نه ګرځي چې حکومت عمران خان نه وي خوشې کړی.
دا مهال د پاکستان په ډیرو سیمو کې اسلام اباد ته غځېدلې لارې او بازارونه تړلي دي او په اسلام اباد کې بیړنی حالت اعلان شوی دی.
د بلوچستان په کوټه کې ځایي سیاسي ګوندونو او عامو خلکو له لوري په دغه ښار کې د یوه لس کلن ماشوم د تښتونې په غبرګون له تېرو لسو ورځو راهیسي پرلت دوام لري. د مصور خان په نوم لس کلن ماشوم لس ورځې وړاندې د نامعلومو کسانو له لوري تښتول شوی دی.
د پاکستان د بلوچستان ایالت په مرکز کوټه ښار کې لس ورځې مخکې یو لس کلن ماشوم ښوونځي ته پر لاره د نامعلومو کسانو له لوري وتښتول شو.
د یاد ماشوم له تښتولو وروسته په کوټه ښار کې د سیاسي ګوندونو، عامو خلکو په ګډون د ښوونځیو زده کوونکو پرلت وواهه.
پرلت د کوټې په ښار کې د محکمې، د والي د کور او قومي اسامبلۍ مخې ته وهل شوی دی.
خو د لسو ورځو په تېریدو سره لا هم ځايي امنیتي چارواکي د لس کلن زده کوونکي په پیدا کېدو کې پاتې راغلي.
نن دوشنبه د (لیندۍ پنځمه) د پرلت والو په غوښتنه په بلوچستان ایالت کې کاربندیز اعلان شوی او ورسره سم ټول ښوونځي هم له نن ورځې لپاره رخصت کړل شوي دي.
د تښتول شوي ماشوم پلار محمد رضا کاکړ وايي، د لسو ورځو په تېریدو سره لا هم د ځايي امنیتي چارواکو له لوري د نوموړي د زوی د پیدا کېدو په اړه کوم مثبت ګام نه دی پورته شوی.
پرلت کوونکي د مصور په پیدا کولو کې حکومت او ځايي امنیتي چارواکي په ناغیړۍ تورنوي او وايي، که دغه ماشوم د تښتونکو له منګولو راخوشې نه شي په بلوچستان ایالت کې به پراخ لاریونونه او د لارو بندول پیل کړي.
په پاکستان کې د عمران خان د پلویانو له خوا د حکومت ضد پراخو لاريونونو له پیلېدو سره د ملګرو ملتونو د کډوالو ادارې له افغان کډوالو غوښتي، چې په سیاسي فعالیتونو کې له ګډون ډډه وکړي. دغه سازمان له افغان کډوالو وغوښتل، چې د پاکستان قوانینو او مقرراتو ته درناوی وکړي.
د ملګرو ملتونو د کډوالو ادارې (UNHCR) د یکشنبې په ورځ (د ليندۍ ۴ مه) د خپل وټساپ له لارې په يوه پیغام کې خبر ورکړی: «یو این ایچ سي آر کډوالو ته یادونه کوي، چې د کوربه هیواد په وړاندې له سیاسي فعالیتونو ډډه وکړي.»
دغه سازمان ټینګار کړی، چې د لاریونونو پر مهال عامه شتمنیو ته د زیان رسولو په ګډون ځینې سیاسي فعالیتونه جرمي عمل ګڼل کېدای شي.
د دغه سازمان په پیغام کې راغلي، چې دا ډول کړنې په پاکستان کې د مېشتو افغانانو پر عامه افکارو منفي او مستقیم اغېز لرلی شي.
ملګرو ملتونو په پاکستان کې له مېشتو افغانانو غوښتي، چې د خپل ځان او کورنۍ د خوندي ساتلو لپاره دې له «نامناسب» چلنده ډډه وکړي.
دا غوښتنه په داسې حال کې شوې، چې د پاکستان په بېلابېلو ښارونو کې د تحریک انصاف ګوند د زنداني شوي مشر عمران خان د پلویانو له خوا د حکومت پر ضد پراخ لاریونونه پیل شوي دي.
عمران خان په هیواد کې دننه او بهر له خپلو پلویانو غوښتي، چې د یکشنبې په ورځ په دغو لاریونونو کې برخه واخلي.
تر دې مخکې د پاکستان د ترهګرۍ ضد مرکز خبرداری ورکړی و، چې ښايي د تحریک انصاف د پلویانو غونډې د «ترهګریزو» بریدونو له لارې په نښه شي.
د پاکستان د پنجاب ایالت په فیصل اباد کې پولیسو هغه موټریز کاروان درولی چې د واده په بڼه یې غوښتل اسلام اباد ته لاړ شي او د تحریک انصاف په لاریون او پرلت کې برخه واخلي. په اتو موټرو کې ټول سپاره ۲۷ تنه نیول شوي.
د فیصل اباد پولیس وايي، چې د پي ټي ای دغه غړي په اتو ګلپوښ موټرو کې سپاره وو او په سرګودا سړک یې نیولي دي.
جیوز نیوز وايي، چې پولیسو تر دې مهاله د پنجاب په بېلابېلو ښارونو کې د تحریک انصاف تر ۵۰۰ ډېر غړي نیولي دي.
د تحريک انصاف مشران او غړي د ګوند د مشر عمران خان په غوښتنه نن د اسلام اباد په لور لاریون کوي او په ډي چوک کې به پرلت کوي.
د پنجاب پولیسو ددغه ګوند دوه جګپوړي مشران عامر ډوګر او زین قریشي د ملتان په قادرپوره ټول پلازا کې نیولي دي.
ګوند پر خپلو پلویانو غږ کړې چې د غلامۍ د ځنځیرونو ماتولو لپاره په دغه لاریون او پرلت کې برخه واخلي.
عمران خان په یوه اعلامیه کې له خپلو پلویانو غوښتي چې د خپلواکۍ او عدالت لپاره د لاریون برخه وګرځي.
حکومت د لاریون د مخنیوي لپاره په پلازمېنه اسلام اباد کې ګڼ امنیتي ځواکونه ځای پرځای کړي او سره زون ته غځېدلې لارې یې په خنډونو او کانټینرو بندې کړې دي.
د پاکستان د کورنیو چارو وزارت اعلان کړی چې دوی د محکمې د حکم له مخې د لاریون اجازه نه ور کوي او څوک چې عامه نظم ګډوډوي له قانوني چلند سره به مخ شي.
تحریک انصاف اعلان کړی چې دوی به د خپل مشر د خلاصون لپاره لاریون او پرلت ته ادامه ور کوي.
د پاکستان د ایکسپرېس ټربیون د رپوټ له مخې، د خیبر پښتونخوا سروزیر امین ګنډاپور وویل چې دوی به د خنډونو لرې کولو لپاره شخصي وسایل راوړي او ټول خنډونه به له مخې لرې کړي، چې لاریون کوونکو ته د لاریون او پرلت لارې پرانېستل شي.
کانټینر پلازمېنې ته پر ټولو مهمو لویو غځېدلو لارو اېښودل شوي چې د لاریون مهمو سیمو ډي څلورلارې ، اسلام اباد هوايي ډګر او اې ۱۱ او نوې مارګله روډ ته لاسرسی محدودي.
حکومت دغه راز د لاهور، راولپنډۍ او اسلام اباد نښلوونکې لارې هم بندې کړې دي.
په پاکستان کې د تحریک انصاف دغه لاریون داسې مهال دی چې یوخوا ددغه هېواد د ملي عمل کمیټې په بلوچستان کې د پوځي عملیاتو اجازه ور کړې او بل پلو د خیبر پښتونخوا په کورمه ولسوالۍ کې له څو ورځو راهیسې مذهبي شخړې روانې دي.