طالبان: ۱۷۴ کورنۍ په یوه ورځ له پاکستان او ایرانه راستنې شوې

دغه اژانس د سې شنبې په ورځ د (لیندۍ ۶مه) پر اېکس پاڼه لیکلي، چې ۸ کورنۍ د ننګرهار ولایت د تورخم له لارې او ۱۶ کورنۍ د کندهار ولایت د سپین بولدک له لارې له پاکستانه راستنې شوې او همدارنګه ۴۲ کورنۍ د نیمروز ولایت د ورېښمو پله له لارې او ۱۰۸ کورنۍ د هرات ولایت د اسلام کلا له لارې له ایرانه افغانستان ته راستنې شوې دي.
باختر اژانس د طالبانو د کډواو او راستنېدو چارو وزارت له قوله لیکلي، چې له ګاوڼدیو هېوادونو څخه ۱۹ راستنې شوې کورنۍ خپلو اصلي سیمو ته لېږدول شوې دي.
طالبانو ویلي، چې په تېره یوه میاشت کې یوازې د کندهار د سپین بولدک له لارې ۷۲۷ کورنۍ له پاکستانه هېواد ته ستنې شوې دي.
طالبانو ویلي، چې په راستنوشویو کسانو کې ۲۲۲ بندیان هم شامل وو.
دا په داسې حال کې ده، چې د کډوالو لپاره د ملګرو ملتونو عالي کمېشنرۍ ویلي، چې په روان کال کې له ایران څخه د افغان کډوالو په ستنولو کې ۱۸ سلنه ډېروالی راغلی دی.