د طالبانو تر واک لاندې د باختر دولتي خبري اژانس رپوټ ورکړی، چې د بدخشان ولایت له نشه يي توکو سره دمبارزې ځواکونو د مرکز فیض اباد په کډون په ارګو او یفتل پایان ولسوالیو کې د کوکنارو کښت پرمهال ٣١ تنه له يوه اندازه د تریاکو له تخم سره ونيول.
د طالبانو د بدخشان د امنيې قوماندانۍ له نشه يي توکو سره د مبارزې مدير شفيق الله حفیظي وویل چې نیول شوي ٣١ تنه د نشه يي توکو پر وړاندې د مبارزې رياست ته لېږدول شوي او د څېړنو لپاره د بدخشان ښار ابتدايه محکمې ته وسپارل شي ترڅو دوسیې پرمخ لاړې شي.
حفیظي وايي چې له نیول شوو کسانو سره د ترياکو پر تخمونو سربېره د ٢٤ موبايلونو په ګډون يو شمېر مخابراتي وسايل هم نيول شوي دي.
طالبان وايي چا ته به اجازه ورنه کړي چې په خپلو ځمکو کې د کوکنارو کښت وکړي او دوی هڅې کوي ترڅو د دې نشه یي توکو د قاچاق او پلور مخه ونیسي.
د طالبانو له دې سختو بندیزونو سره سره بیا هم د بدخشان ځیني ځايي اوسېدونکي په خپلو کروندو کې د کوکنارو کښت ته مخه کړې او د طالبانو د مشر د فرمان پرضد ودریږي.
د روان کال د جنګاښ په میاشت کې د بدخشان د درایم او ارګو ولسوالیو اوسېدونکي د طالبانو پرضد لاریونونه وکړل او دغه لاریونونه په تاوتریخوالي واوښتل چې یو شمیر ځايي لاریونوال د طالبانو له خوا په ډزو ووژل شول.
دغه لاریونونه له هغه وروسته پیل شول، چې طالبانو د بدخشان په ارګو او درایم ولسوالیو کې د ځايي خلکو د کوکنارو د کښتونو اړولو هڅه وکړه.
واک ته د طالبانو له رسېدو څو میاشتې وروسته د طالبانو مشر ملا هبت الله اخوندزاده د یو فرمان له مخې، د تریاکو پر کر، پېر او پلور بندیز ولګاوه.
که څه هم طالبان په افغانستان کې د تریاکو د کر مخنیوی یوه لویه لاسته راوړنه بولي؛ خو دغه ډله نه ده توانېدلې، چې کروندهګرو ته د کوکنارو د کر بدیل پیدا کړي.
