ایرنا:د افغانستان، ایران، هند او ازبکستان ګډې کارډلې د چابهار د ټرانزېټ اسانتیاوې وارزولې

د ایران رسنۍ د دغه هېواد د چارواکو له قوله وايي، د هند په کوربتوب د افغانستان، ایران او ازبکستان ګډې کارډلې د چابهار بندر د ټرانزېټ او زيربناوو په برخه کې د اسانتياوو د ارزولو او خنډونو د لرې کولو لپاره غونډه کړې.

ایرنا خبري اژانس وايي، دغه غونډه په ممبيي په ښار کې جوړه شوې او د ایران د چابهار بندر د اقتصادي چارو مرستيال حسين شهدادي پکې ګډون درلود.

د ایرنا د شنبې ورځې د خبر له مخې، دغې کارډلې د چابهار له لارې د سوداګريزو راکړو ورکړو د اسانتیاو او د ستونزو د حل په موخه بحث کړی دی.

ایرنا وايي، د چابهار د ګډې کارډلې په دریمه غونډه کې «د افغانستان، هند او ازبکستان د بندرونو، د ټرانزيټ او اوبو وزارتونو لوړپوړو چارواکو، په هند کې د افغانستان، ازبکستان او ایران سفیرانو، د هند د بهرنيو چارو وزارت چارواکو او د فعالو خصوصي سکټورنو او سوداګرۍ خونې مشرانو ګډون درلود.»

تېره مياشت د لړم په ۱۷ مه د طالبانو د بهرنیو چارو وزارت ويلي و، چې د هند ځانګړي استازي جي پي سېنګ د امیرخان متقي سره په لیدنه کې د چابهار بندر په اړه د سیمې د هېوادونو، افغانستان او هند تر منځ د خبرو اترو د شروع کېدو اړوند خبرې کړې دي.