د پاکستان دولتي ټلویزیون د خیبر پښتونخوا ایالت د سرحدونو او قبایلو چارو ایالتي وزیر له قوله راپور ورکړی، چې ملګري ملتونه او نړۍواله ټولنه دې په دغه هېواد کې د مېشتو ۳ میلیون افغان کډوالو لپاره له پاکستان سره مرسته وکړي.
د پاکستان دولتي ټلویزیون د یکشنبې په ورځ د (لیندۍ ۱۷مه) د خیبر پښتونخوا د سرحدونو او قبایلو چارو ایالتي وزیر امیر مقام له قوله راپور ورکړی، چې په پاکستان کې تر درې میلیونه ډير افغان کډوال له ډيره وخته مېشت دي.
نوموړي له ملګرو ملتونو او نړیوالې ټولنې غوښتنه کړې، چې د دغو افغان کډوالو لپاره باید له پاکستان سره مرسته وکړي.
دغه پاکستانی چارواکی وايي، که افغان کډوال غواړي چې په خپله خوښه خپل هېواد ته ستانه شي، د هغوی لپاره به پاکستان اسانتیاوې برابرې کړي.
امیر مقام وايي، په پاکستان کې د نورو هېوادونو پرتله ډیر افغان کډوال مېشت دي، چې دا مهال یې شمېر ۳ میلیونو ته رسیدلی دی.
د خیبر پښتونخوا د سرحدونو او قبایلو چارو ایالتي وزیر په داسې حال کې د ملګرو ملتونو او نړیوالې ټولنې څخه د افغان کډوالو لپاره پاکستان ته د مرستې غوښتنه کوي، چې څو ځله د دغه هېواد د چارواکو له لوري د افغان کډوالو د ستونزو د حل په موخه ژمنې شوي، خو بیا هم پاکستان نږدې هره ورځ لسګونه افغان کډوالې کورنۍ له ځورولو او بندي کولو وروسته په زور له خپل هېواده باسي.
