الجزیرې ټلویزیون راپور ورکړی، چې په غزه کې یوه روغتون ته څیرمه د کډوالو پر یوه پنډغالي د اسراییل په برید کې له ۵۰ ډیر کسان وژل شوي. د راپور له مخې په وژل شویو کې ښځې او ماشومان هم شامل دي.
د دغه رسنۍ د راپور له مخې، چې د شنبې په ورځ د (لیندۍ ۱۷مه) یې خپور کړی راغلي، چې د غزې په مرکزي ښار نصیرات کې د کډوالو پر پنډغالي د اسراییلو په بریدونو کې د شپږو ماشومانو او پنځو ښځو په ګډون تر ۲۰ ډير کسان وژل شوي دي.
همدارنګه په دغه راپور کې د غزې د ملکي دفاع ادارې له قوله ویل شوي، چې د غزې په شمالي بیت الاهیه کې د کمال عدوان روغتون ته څیرمه د اندونیزیا روغتون هم د اسراییل تر بریدونو لاندې راغلی او په دغو بریدونو کې لږ تر لږه ۲۹ کسان وژل شوي دي.
الجزیرې د خپل یوه خبریال له قوله په دغه راپور کې زیاته کړې، چې اسراییلي ټانکونه او بې پیلوټه الوتکې د کمال عدوان روغتون په شاوخوا کې فعالیت لري او د روغتون څخه د باندې او د ننه پر هر حرکت کوونکي برید کوي.
د غزې په تړانګه کې د ۲۰۲۳ کال د اکټوبر له ۷ راهیسې د اسراییل په جګړه کې لږ تر لږه ۴۴۶۱۲ فلسطینیان وژل شوي او ۱۰۵،۸۳۴ ټپیان شوي دي، بل خوا د حماس په مشرۍ پر اسراییل د بریدونو په ترڅ کې لږ تر لږه ۱۱۳۹ تنه وژل شوي او تر ۲۰۰ زیات کسان یرغمل شوي وو.
