د الو ارجون په مرکزي رول کې د پوشپا ۲ فلم د نندارې په دوو ورځو کې ۴۰۰ کروړه هندۍ روپۍ وګټلې. دغه فلم د هند په سینما کې د نوي ریکارډ په جوړولو سره پخواني ریکارډونه مات کړل.
د انډیا ټو ډې ورځپاڼې د راپور له مخې د پوشپا ۲ فلم د هند په سینما کې نوي ریکارډونه په خپل نوم کړل.
د دغې هندۍ رسنۍ د راپور له مخې پوشپا ۲ فلم د هغو فلمونو په نوملړ کې په لومړي مقام کې راغلی او د هندوستان د سینما په تاریخ کې یې د نندارې په لومړۍ ورځ ډيرې پیسې وګټلې.
د راپورونو له مخې دغه فلم په دوو ورځو کې په هندوستان او نورو هېوادونو کې ۴۰۰ کروړه روپۍ ګټلې چې یوازې د هند له سینماو څخه یې ۲۶،۵ میلیونه روپۍ تر لاسه کړې دي.
پوشپا ۲ فلم د شاهرخ خان د جوان، او د راجا مورلي په لارښونه جوړ شوي فلم (ار ار ار) او (کې جې اېف) په څېر فلمونو چې یو په بل پسې یې ریکارډونه جوړ کړي وو، ټول مات کړل او د هند د سینما په تاریخ کې یې په لومړۍ ورځ د ډيرو پیسو ګټلو ریکارډ په خپل نوم ثبت کړ.
پوشپا ۲ فلم د ډيسمبر په ۵ نېټه په سینماو کې نندارې ته وړاندې شو، او په لومړۍ ورځ یې د ۲۹۴ کروړه روپیو په ګټلو د هند د سینما په تاریخ کې نوی ریکارډ جوړ کړ.
د پوشپا په فلم کې الو ارجون او رشمیکا ماندانا او فاهد فاصیل مرکزي رولونه لري.
دا یو تیلګو اکشن ډرامه فلم دی چې د سوکومار په لارښوونه جوړ شوی او د دغه فلم لومړۍ برخه په ۲۰۲۱ کال کې خپره شوه، چې په هغه کال هم د ډيرو پيسو ګټونکو فلمونو په نوملړ کې شامل شوی و.
