د افغانستان لپاره د امریکا سفارت یوه سلاکاره کیټي نېټ وایي، د جنسیت پر بنسټ تاوتریخوالی یوازې فزیکي نه؛ بلکې د هغو پالیسیو له لارې هم پلي کېږي، چې زدهکړو ته د ښځو لاسرسی منعه کوي او په ټولنه او اقتصاد کې د دوی ګډون محدودوي.
نوموړې دغه څرګندونې د کابل لپاره د امریکا سفارت پر اېکس پاڼه په خپره شوې یوې ویډیو کې کړې دي.
هغې ویلي: «موږ باید د جنسیت پر بنسټ د تاوتریخوالي د ټولو ډولونو په وړاندې ودرېږو او مېرمنې ځواکمنې کړو، چې له خپلو حقونو بېرته برخمنې شي.»
د هغې په وینا، د جنسیت پر بنسټ تاوتریخوالی د بشري حقونو تر ټولو پراخه سرغړونې دي چې په ټوله نړۍ کې ښځې او نجونې اغېزمنوي.
دغه سفارت تېرماښام د امریکا د پراختیا نړۍوالې ادارې د ماموریت مرستیال مشر مایکل اشکوري څرګندونې هم خپرې کړې وې.
هغه ویلي و، افغان ښځې او نجونې د هغو بندیزونو له امله چې پر هغوی لګول شوي، هغوی یې بې هویته کړې او د هغوی غږ یې ټپ کړی دی.
د هغه په وینا، د طالبانو د امر بالمعروف او نهې عن المنکر ظالمانه قانون وضعیت نور هم پېچلی او کړکېچن کړی دی.