د بښنې نړۍوال سازمان په افغانستان کې د طالبانو لهخوا په طبي انسټیټوټونو کې د نجونو پر زدهکړو بندیز ته په غبرګون کې ویلي، چې طالبان باید د جنسیت پر بنسټ د ښځو د ځورونې سیسټم ژر تر ژره ودروي.
دغه سازمان د سې شنبې په ورځ (د لېندۍ ۲۷مه) پر اېکس پاڼه لیکلي، چې طالبانو په طبي انسټیټوټونو کې د نجونو پر زدهکړو بندیز لګولی چې له دې سره به په افغانستان کې د زدهکړو د لارې وروستۍ دروازه هم وتړل شي.
د طالبانو مشر ملا هبت الله اخوندزاده (د لېندۍ په ۱۳مه) په یوه نوي فرمان کې په طبي انسټیټوټونو کې د نجونو پر زدهکړو بندیز ولګاوه.
له هغه وروسته د طالبانو د عامې روغتیا وزارت د انسټیټوټونو مسوولانو ته ویلي، چې تر دې وروسته نجونې په دغو مرکزونو کې د زدهکړو اجازه نه لري.
طالبانو تر دې وړاندې له طبي انسټیټوټونو پرته له شپږم ټولګي پورته په ټولو روزنیزو مرکزونو کې د نجونو په زدهکړو بندیز لګولی و.
د طالبانو دغه کړنې په وار، وار د نړۍوالو غبرګونونه راپارولي دي.