طالبانو پر ډیورنډ کرښه د سوداګریزو مارکیټونو د جوړولو سره پریکون کړی
د پاکستان ډان ورځپاڼې پخپل تازه راپور کې لیکلي چې طالبانو د پاکستان هغه وړاندیز نه دی منلی، چې له مخې یې د ډیورنډ پر کرښه د سوداګریزو بازارونو د جوړولو پرېکړه شوې وه.
د پاکستان ډان ورځپاڼې پخپل تازه راپور کې لیکلي چې طالبانو د پاکستان هغه وړاندیز نه دی منلی، چې له مخې یې د ډیورنډ پر کرښه د سوداګریزو بازارونو د جوړولو پرېکړه شوې وه.
د پاکستان د مشرانو جرګې تر دې وړاندې د ډیورنډ په کرښه او ایران سره پر پوله د دغو کوچنیو سوداګریزو بازارونو وړاندیز کړی و او ویلي یې و چې په دې سره به د دواړو غاړو خلکو ته ګټه ورسیږي او سوداګریزې راکړې ورکړې به ډېرې شي.
دا رنګه پاکستاني سناتورانو ویلي، چې دغه سوداګریز مارکیټونه به په هغو سیمو کې جوړیږي چې د پرمختیایي اړخه وروسته پاتې شوې دي.
پاکستاني سناتورانو د هغه هېواد دولتي بانک او د سوداګرۍ وزارت ته لارښوونه کړې چې په دې اړه ګډه غونډه جوړه کړي چې په کرښه د سوداګرو پاتې توکي ژر تر ژره لویو ښارونو ته ولیږدول شي چې سوداګرو ته زیانونه وا نه وړي.
خو د ډان ورځپاڼې په راپور کې نه دي ویل شوي چې طالبانو د کومو لاملونو له مخې د دغه کار مخالفت کړی، خو په پېښور کې خبریال رفعت الله ورکزی وایي: «پر ډیورنډ کرښه د سوداګریز بازار د جوړولو پرېکړه په کال ۲۰۲۰ کې د جمهوري نظام پر مهال شوې وه، او ویل شوي و چې پر کرښه به ۱۲ کوچني سوداګریز مارکیټونه جوړیږي، خو واک ته د طالبانو له راتګ سره دغه پرېکړه وځنډول شوه.»
ښاغلی ورکزي زیاته کړه: «له هغه مهاله چې د طالبانو او پاکستان تر منځ اړی ګړی زیات شوی دواړه خواوې پر یو بل د فشار د زیاتولو په موخه یو لړ خنډونه رامنځته کوي، که پاکستانی لوری د ویزو په ورکړه، د کډوالو په ایستلو او د افغانستان په سوداګریزو توکو د مالیې پر زیاتولو فشار زیاتوي، ورسره طالبان بیا د دغسې پرېکړو په شا کیږي او په دې توګه پاکستان ته زور ښکاره کوي.»
خو په ټوله کې دغه شان سیاسي ناندریو زیانونه د دواړو غاړو سوداګرو او ولسي خلکو ته اوړي، هر کله چې د دواړو هېوادونو تر منځ سیاسي کړکېچ زور اخلي ورسره هم مهاله سوداګریزه راکړه ورکړه کمیږي او د سوداګرو توکي د خوسا کېدو سره مخامخیږي، تر دې وړاندې هم د دواړو هېوادونو سوداګرو له خپلو چارواکو غوښتي و چې سیاسي مسلې باید له سوداګریزو مسلو څخه لرې وساتي، خو د اوسني وضعیت څخه داسې څرک نه لګیږي چې د دواړو خواو تر منځ به سوداګري وده وکړي او یا به د پخوا په شان وغوړیږي.
