پاکستاني رسنۍ: له اسلام اباده نیول شوي ۷۸۱ بې‌اسناده افغانان افغانستان ته ستانه کړای شوي

په دغه راپور کې د دغو کډوالو د اېستنې مودې ته اشاره نه ده شوې.

خو د کډوالو په چارو کې د ملګرو ملتونو عالي کمېشنرۍ او د کډوالۍ نړۍوال سازمان له‌خوا په ګډې خپرې شوې خبرپاڼه کې راغلي، چې د روان کال له پیله بیا تر دې دمه یوازې له پېنډۍ او اسلام اباده د ښځو او ماشومانو په ګډون له ۸۰۰ څخه زیات افغانان له نیول کېدو وروسته له دغه هېواده اېستل شوي دي.
جیونیوز د پاکستان په کورنیو چارو وزارت کې د سرچینو په حواله لیکلي، چې پاکستان د بې‌اسناده بهرنیانو د اېستلو لړۍ پیل کړې.
د جیونیوز د راپور له مخې، هغه افغانان چې په پاکستان کې اروپایي او نورو هېوادونو ته د تګ لپاره د ویزو په تمه دي؛ لا له دغه هېواده نه دي اېستل شوي.
خو د افغانستان انټرنشنل د سرچینو د معلوماتو له مخې، د پاکستان حکومت د ۲۰۲۵کال له پیل راهیسې په اسلام اباد کې مېشت ګڼ هغه افغانان له دغه هېواده اېستي، چې د نورو بهرنیو هېوادونو ته د تګ په تمه وو.
د سرچینو په وینا، د دغو کسانو د ویزو موده ختمه شوې وه او د تمدید لپاره یې غوښتنلیک هم استولی و؛ خو د پاکستان حکومت دوی ونیول او څو ورځې یې په حاجي کمي کې وساتل او له هغه وروسته یې افغانستان ته ستانه کړل.
د شهباز شریف په مشرۍ د پاکستان حکومت پلان لري، چې د افغان کډوالو او پناه غوښتونکو د ډله‌ییزې اېستنې یو نوی پړاو پیل کړي.
د هغو سندونو له مخې، چې افغانستان انټرنشنل تر لاسه کړي د پاکستان حکومت تېره چهارشنبه د شهباز شریف په مشرۍ په یوه غونډه کې د افغان کډوالو ډله‌ییز اېستل تصویب کړل.
هغه افغانان چې د بیا مېشتیدنې په موخه درېیم هېوادونو ته ځي د ۲۰۲۵ کال د مارچ تر ۳۱مې نیټې پورې به له اسلام اباد او راولپنډۍ و اېستل شي.