د پاکستان حکومت په پلازمېنه اسلام اباد کې مېشتو افغان کډوالو ته ویلي، چې د مارچ تر ۳۱مې نېټې دې له اسلام اباد څخه ووځي. پاکستان د خپل له دې اقدام سره غواړي چې د نورو لویډیځو هېوادونو تر څنګ پر امریکا هم فشار راوړي چې د کډوالو په اړه ژر تر ژره لاس په کار شي.
د نیویارک ټایمز د راپور له مخې، د پاکستان یوه اندېښنه داده چې، افغان طالبان «پاکستاني وسله والو ته پناه ورکوي چې له پولې هاخوا بریدونه کوي." مګر افغان طالبانو دا تورونه په کراتو رد کړي دي.
همدا ډول پاکستان دا هم ویلي چې د دوی په هېواد کې یو شمېر افغانان په ترهګریزو فعالیتونو کې ښکېل دي.
د متحده ایالاتو له خوا د افغان کډوالو د انتقال پروګرام ځنډلو سره پاکستان ګواښ کړی، که امریکا او یا بل کوم هېواد افغان کډوالو ونه مني نو بېرته به د طالبانو تر واکمنۍ لاندې افغانستان ته واستول شي.
د نیویارک ټایمز د راپور له مخې، په اسلام اباد کې د دغو افغان کډوالو له ډلې شاوخوا ۱۵ زره یې په امریکا کې د مېشتېدو غوښتنه کړې، خو د امریکا د کډوالو د پروګرامونو ځنډېدو د دغو کډوالو په اړه دا اندېښنه راپورته کړې چې ایا دوی به امریکا ته یوړل شي کنه.
له دغو کډوالو څخه ډېرو یې یا مستقیم او یا هم د دوی د کورنۍ غړو له امریکایي پوځ سره په داسې حال کې همکاري کړي کله چې امریکا په افغانستان کې پوځي ماموریت ترسره کاوه.
د ملګرو ملتونو د بشري حقونو کمېسیون ویلي دي، چې دا کډوال بېرته خپلو کورونو ته د ستنیدو په صورت کې د طالبانو له غچ اخیستنې له ګواښ سره مخامخ دي.
دغه کمېسیون له پاکستان څخه غوښتي، مخکې له دې چې دوی له پاکستان څخه واېستل شي د دغو کډوالو خوندیتوب دې په پام کې ونیسي.
