د پاکستان د دفاع وزیر خواجه اصف ویلي: «ډېر شور او غوغا جوړه وه، چې د امریکا ولسمشر ټرمپ به راځي او د پاکستان تحریک انصاف بنسټګر عمران خان به ازاد شي، خو ټرمپ راغی او د عمران خان لپاره یې هېڅ ونه کړل.»
خواجه اصف دا څرګندونې د شنبې په ورځ په سیالکوټ کې یوه خبري کنفرانس کې وکړې.
هغه په خپلو خبرو کې پوښتنه وکړه، چې داسې لاریونونه په پنجاب، سند یا بلوچستان کې ولې نه ښکاري؟ د پي ټي ای مشري په نورو درېیږ صوبو کې ولې نه ښکاري؟ که په سوله ییزه توګه لاریونونه وشي موږ ورسره هېڅ ستونزه نه لرو، مګر د دوی هر لاریون تشدد ته وده ورکوي.
اصف وویل: «اجازه به ورنه کړي، چې د مې ۹مه یا ۲۶نومبر بیا تکرار شي. ګنډاپور وویل چې د دوی ۹۹ سلنه غوښتنې منل شوي دي، که چېرې د پي ټي ای ۹۹ سلنه غوښټنې منل شوي نو د لاریون کولو ته څه اړتیا ده؟»
د پاکستان د دفاع وزیر زیاته کړه، یو وخت شور او غوغا وه چې ټرمپ به راشي نو د تحریک انصاف ګوند بنسټګر به ازاد شي، خو ټرمپ راغی او د عمران خان لپاره یې هېڅ ونه کړل، که امریکا په دې اړه کومه غوښتنه هم وکړي، زموږ لپاره مهمه نه ده چې پوره یې کړو.
هغه همدارنګه وویل، چې پی ټي ای په مذاکراتو کې لوبه کوي او خپلو کارکوونکو ته ډاډ ورکوي، خو په دې شرایطو کې چانس نه ښکاري، چې پی ټي ای سره مذاکرات وکړي.
هغه دا هم وویل، چې تحریک انصاف ګوند مذاکراتو کې لوبه کوي او د دغې لوبې په ترڅ کې د دوی هدف بل څه دی.
هغه وویل: "پی ټي ای د مذاکراتو د لوبې په ترڅ کې یو بل هدف لري."
نن شنبه (د فېبروري ۸مه) نېټه په پاکستان کې د ټاکنو یو کال پوره شو، چې په کې د مسلم لیګ نواز ډلې په مشرۍ ټلوالې حکومت جوړ کړ.
تحریک انصاف ګوند پر حاکم ګوند په ټاکنو کې د درغلیو او لاس وهنو د تور له امله دغې ورځې ته د تورې ورځې نوم ورکړی او په دغه ورځ یې د پاکستان په بېلابېلو ښارونو کې لاریونونه کړي دي.
خو د پاکستان حکومت په پنجاب او بلو چستان صوبو کې د خلکو پر راټولېدنې، لاریونونو او سیاسي غونډو بندیز لګولی دی.
د پاکستانی رسنیو د راپورونو له مخې، پولیس د ۱۴۴ دفعې څخه د سرغړونې له امله په ملتان کې د تحریک انصاف ګوند د مهم غړي شاه محمود قریشي لور مهر بانو قریشي، د اسمبلۍ پخوانی غړی ذاهد بهار هاشمي او دلیر مهار نیولي دي.
پولیسو په دغه لاریون کې د تحریک انصاف ګوند شاوخوا لس تنه نور پلویان هم نیولي دي.
د راپورونو له مخې، د پاکستان تر واک لاندې کشمیر په مظفر اباد کې هم پولیسو د تحریک انصاف ګوند یو شمېر پلویان نیولي دي.
پولیسو ویلي، چې په مظفر اباد کې یې د تحریک انصاف ګوند د ۱۶ پلویانو ترڅنګ د اپوزیسیون مشر خواجه فاروق هم نیولی او په کورني بند کې ساتل کېږي.
خو د پښتونخوا صوبي حکومت چې د تحریک انصاف ګوند په واک کې دی هلته هم نن لاریونونه شوي او تردې مهاله له یادې صوبې د پولیسو له خوا د تحریک انصاف د ګوند د پلویانو او غړو د نیولو په اړه کوم راپور نه دی ورکول شوی.
