د ناڅرګندو هېکرانو لهخوا د طالبانو د افشا شویو سندونو په لړ کې یو هم د اترا ادارې اړوند مکتوب دی، چې ځیني مخابراتي شرکتونه یې د غیر اخلاقي سایټونو د نه بندولو له امله نغدي جریمه کړي دي. په دې کې هغه شرکتونه هم جریمه شوي، چې سیم کارتونه یې غیر قانوني پلورلي دي.
د طالب لیکس په افشا شویو سندونو کې د اترا ادارې اړوند هم یو سند شته چې پکې د غیر اخلاقي ویب پاڼو د نه بندیدو له کبله د افغانستان د مخابراتي سکټور اکثریت شرکتونه جریمه شوي دي.
په دغو شرکتونو کې له افغان بېسیم پرته په افغانستان کې فعال ټول مخابراتي شرکتونه نغدي جریمه کړای شوي دي.
د افغان بېسیم شرکت د ناقانونه سیم کارتونو د پلورنې له کبله له نورو شرکتونو سره یو ځای د جریمو په دغه نوملړ کې شامل دی.
دغه جریمې له دوه نیم میلیونه افغانیو څخه نیولې تر ۵ سوه زره افغانیو پورې لګول شوې دي.
په افشاد شوي سند کې د کال او میاشتې اړوند هېڅ کومه دقیقه نېټه نه ده لیکل شوې او یوازې دوو شرکتونو جریمه ورکړي او پاتې نورو نه دي ورکړې.
د طالبانو تر واک لاندې د اترا ادارې په افشا شويو سندونو کې طالبان له هغو شرکتونو هم جریمې غواړي چې د تېر حکومت پرمهال جریمه شوی دي.
د هېکرانو ډلې لهخوا په افشا شویو سندونو کې یو هم په پکتیا ولایت کې د طالبانو د عامې روغتیا ریاست اړوند یو مکتوب دی، چې پکې یې خوست ولایت کې د دغې ډلې د عامې روغتیا ریاست څخه غوښتي چې د نري رنځ اړوند د ظرفیت لوړونې یو روزنیز پروګرام ته دې ورته ښځینه متخصصې ډاکټرانې پیدا کړي.
خوست او پکتیا هغه ولایتونه دي، چې د جمهوريت پر مهال پکې د طالبانو د جګړو له کبله نجونې په لرو پرتو ولسوالیو کې له لوړو زدهکړو محرومې وې؛ خو واک ته د طالبانو له رسېدو وروسته بیا ملاهبت الله په ټول هېواد کې تازه په طبي برخه کې د نجونو پر زدهکړو هم بندیزونه لګولي دي.
په مکتوب کې راغلي، چې د ملګرو ملتونو د روغتیا نړۍوال سازمان له لوري د نري رنځ اړوند روزنیز پروګرام د ۱۴۰۳کال (د زمري میاشتې په ۲۱مې نېټې) ترسره کېږي او یوازې د ښځینه ډاکټرانو لپاره دی.
له څه باندې درېیو کلونو په تېرېدو پر زدهکړو د طالبانو لهخوا د بندیزونو پر دوام د طالبانو روغتيا وزارت د دسمبر مياشتې پر دویمه د ټولو طبي انسټیټیوټونو مشرانو ته مکتوبونه ولېږل، چې نجونې نور د طب په برخه کې زدهکړې نه شي کولای.
له دې سره یې هممهاله په ټول افغانستان کې نجونې له طبې زدهکړو منع کړل شوې.
د طالبانو د روغتیا وزارت سرچینو له دغه بندیز وروسته رسنیو ته ویلي و، چې د دغه بندیز له امله په لسو دولتي او ۱۵۰ خصوصي روزنیزو مرکزونو کې شاوخوا ۳۵ زره ښځینه زدهکړیالانې له طبي او د روغتیاپالنې له زدهکړو محرومې شوې.
بیا د رسمي معلوماتو له مخې، په ټول افغانستان کې يوازې له شپږم ټولګي لوړې ۱.۴ مېليونه نجونې له زدهکړو بې برخې شوې دي.
د دغو خپرو شویو سندونو په منځ کې د یوه هندي انجینر د پاسپورټ انځور هم راغلی، چې ورسره د ورکړل شویو پیسو یو ضمني رسید هم پکې ښکاري.
ښايي طالبانو ځیني هندي انجینران په «فري لانس» یا ازاده توګه د خپلو ځینو کارونو لپاره ګومارلي وي او د مخابراتو وزارت تر څنګ د اترا ادارې د ځینو چارو لپاره هم ترې ګټه واخلي.
د طالب لیکس د هېکرانو ډلې لهخوا په خپرو شویو اسنادو کې موندل شوی پاسپورټ د یوه ۴۴ کلن هندي انجینر دی، چې « جین ټوشار » نومېږي او د هندوستان د اتر پردېش ایالت اوسېدونکی دی.
په یوه سند کې ښکاري، چې نوموړي ۲۴۶زره پیسې ترلاسه کړې چې ښايي افغانۍ وي او طالبانو ورته لېږلې وي.
دغه پیسې د جون میاشتې په ۲۶مه نېټه ترلاسه شوې؛ خو کال یې نه دی لیکل شوی.
تر دې وړاندې داسې راپورونه هم خپاره شوي و، چې د ډیجیټلي مدیریت او برېښنايي اسنادو د کنټرول په برخه کې طالبانو ځیني پاکستاني انجینران ګومارلي دي.
دغو پاکستاني انجینرانو د طالبانو د استخباراتو ریاست تر څنګ په بېلابېلو ادارو کې د ډیجیټلي امنیت په برخه کې کار کاوه.
د دغې ډلې لهخوا په خپرو شویو سندونو کې راغلي، په پاکستان کې د طالبانو سفیر له خپل بهرنیو چارو وزارت څخه په یو مکتوب کې غوښتي چې د «لابیستۍ» په برخه کې ورته میاشتني امتیازات ډېر کړي؛ ترڅو له بېلابېلو سیاسي شخصیتونو، ژورنالېستانو او د ټولنې نورو قشرونو سره پرې خپلې ناستې ولاړې دوامداره وساتي.
په دغه مکتوب کې راغلي، چې د طالبانو سفیر سردار احمد شکېب د خپلو سفارتي فعالیتونو د لا پراختیا او خپلې ډلې ته د لابي ګرۍ لپاره د نورې بودجې ترلاسه کولو هڅه کوي.
په مکتوب کې زیاته شوې:« د لابیستۍ په برخه کې د میاشتې ۲۵۰۰ ډالر چې د مرکز لهخوا منظور شوي؛ په کوربه هېواد کې اړونده موخو ته د رسېدو لپاره ناکافي دي.»
په دغه مکتوب کې غوښتنه شوې، چې په دې برخه کې دې امتیازات ورته د میاشتې ۳۰۰۰ ډالر کړي.
د هېکرانو ډلې لهخوا د دغه سفارت اړوند په یو بل مکتوب کې راغلي، چې په اسلام اباد کې د طالبانو سفارت د «لابیستۍ» په برخه کې د ۱۴۰۲کال په درېیمې او څلورمې ربع کې شاوخوا ۸۵۰۰ ډالر لګولي دي، چې ۳۰۰۰ ډالر یې په درېمه ربع کې او ۵۵۰۰ ډالر یې په دویمه ربع کې لګولي دي.
په دې وروستیو کې د«طالب لیکس» په نامه د هېکرانو یوې ناپېژانده ډلې د طالبانو د ۲۱ مهمو ادارو او وزارتونو وېبپاڼې هک کړي او غلا شوي مواد یې په انټرنیټ خپاره کړي دي.
په دغه مکتوب کې لیکل شوي، چې د امربالمعروف کارکوونکو په ځینو ولایتونو کې حتی په دوکاندارانو د ماشومانو د هغه پاپړو پلور هم بند کړی، چې ډالۍ په کې اچول شوي وي.
مګر د یاد وزارت په وینا، د ماشومانو پاپړو اړوند بندیز د دوی په اصولو کې نه شته او د دوی محتسبانو په خپل سر دا کار کړی دی.
د دغه مکتوب ګڼه او دقیق تاریخ هم لیکل شوی او د یاد وزارت د دفتر رییس مولوي اسحاق حکیم په لاسلیک د ولایتونو د همغږۍ امریت ته استول شوی او سپارښتنه یې ورته کړې، چې ټولو ولایتونو کې یې د امربالمعروف ریاستونو ته واستوي.
د سیاسي چارو شنونکو په اند، د طالبانو د رژیم افشا شوي اسناد یو واضح انځور وړاندې کوي، چې د دوی د حکومتدارۍ طریقه، فکري بڼه، مالي سیاستونه، فساد، اداري انارشيزم او ددغې ډلې غچ اخیستنه ښيي.
دغه اسناد څرګندوي، چې طالبان یو مشخص اداري نظام اوسلسله مراتبو ته درناوی نه لري او پرېکړې د شخصي نفوذ او د دغې ډلې د مشر سره د نږدې اړیکو پراساس ترسره کېږي.
