د پښتونخوا حکومت په کورمه کې د وسلهوالو پر ضد د پوځي عملیاتو د بیا پیل خبر ورکړی
د ډان ورځپاڼې د راپور له مخې، د پښتونخوا حکومت په کورمه کې د وسلهوالو پر ضد د پوځي عملیاتو د بیا پیل اعلان وروسته له هغه وکړ، چې د دوشنبې په ورځ دغې سیمې ته د مرستو پر کاروان د وسله والو په بریدونو کې پنځه پاکستاني امنیتي عسکر ووژل شول.
په کورمه کې له څو میاشتو شخړو وروسته د اوربند تړون لاسلیک شوی و خو له اوربند سره سره د ټل_ پاړه چنار لاره یو وار بیا د تګ راتګ لپاره تړل شوې ده.
د روان کال په پیل کې په کورمه کې د وسلهوالو ډلو ترمنځ د اوربند تړون لاسلیک شو؛ نو سیمې ته مرستې د سختو امنیتي تدابیرو لاندې رسول کېدې.
د ډان د راپور له مخې، چې د دوشنبې په ورځ د مرستې یو کاروان چې څو لارۍ په کې شاملې وې؛ د ټل_ پاړه چنار لارې په اوږدو کې د شپې ناوخته شاوخوا ۱۲:۳۰ بجې د کوزې کورمې په مندوري سیمه کې پرې بریدګرو ډزې وکړې.
سرچینو زیاته کړه، امنیتي پرسونل چې دغه کاروان یې بدرګه کاوه پر وسلهوالو یې ځوابي برید وکړ.
دغې نښتې تر دوو ساعتونو څخه یې زیات دوام وکړ.
په دغه برید کې د پوځ یو سرتېری ووژل شو او اوه تنه نور بیا ټپیان شول.
د سرچینو په وینا، دویم برید د ماښام شاوخوا ۶ بجې په ورته ځای کې هغه وخت وشو؛ کله چې پاکستاني امنیتي ځواکونو هڅه وکړه چې د مرستندویه لاریو د لوټولو څخه د وسلهوالو مخه ونیسي.
له هغه وروسته بریدګرو د سرحدي قول اردو د یوه افسر پر موټر ډزې وکړې او پنځه پرسونل یې ټپیان کړل او بیا ماښام مهال په همدې سیمه کې د اېف سي څلور افسران په یوه برید کې ووژل شول.
ډان د خپلو سرچینو له قوله زیاته کړه، ځایي حکومت باور لري چې ځیني وسلهوال لاهم په سیمه کې شته.
دغه وضعیت ته په کتو د پښتونخوا حکومت پرېکړه وکړه، چې په مندوري او اوچات سیمو کې یو وار بیا پوځي عملیات پیل کړي.
د دغو عملیاتو د پیلولو پرېکړه د پښتونخوا د سر وزیر علي امین ګنډاپور په مشرۍ د شپې ناوخته په یوه غونډه کې شوې ده.