امريکا په بېوزله هېوادونو کې د ماشومانو د واکسيناسيون له يوې ادارې سره مالي مرستې بندوي

امريکا په بېوزله هېوادونو کې د «ګاوي» په نوم د ماشومانو د واکسيناسيون ادارې مالي ملاتړ پای ته رسوي. رویټرز راپور ورکوي، چې دغه اداره په بېوزله هېوادونو کې ماشومانو ته د واکسین د پېر په برخه کې مرستې کوي.

ګاوي ادارې بیا د امریکا د دې پرېکړې په غبرګون کې ویلي، چې د دې سازمان په فعالیتونو کې د متحده ایالاتو ملاتړ حیاتي دی.
یادې ادارې په خپل اېکس کې لیکلي: «د امریکا په مرستو سره به مونږ وکولی شو چې تر راتلونکو پنځو کلونو پورې د څه باندې ۸ مېلیونه کسانو ژوند وژغورو او مېلیونونو ماشومانو ته به د ښه راتلونکي لپاره زمینه برابره کړو.»
د دغه سازمان د ارزونو پربنسټ، له ۲۰۰۰ کال راهیسې یې چې فعالیتونه پیل کړي دي، د ۱۸.۸ مېلیون ماشومانو ژوند ژغورلی دی.
د امریکا حکومت د هغو مرستندویه پروګرامونو نوملړ کانګرس ته سپارلی چې چارې یې بندېږي او ویل کېږي، چې لګښت یې ۷۶ میلیارد ډالرو ته رسېږي.
دا په داسې حال کې ده، چې د امریکا حکومت تر دې وړاندې ژمنه کړې وه، چې له دې پیسو څخه ۴۸ میلیارد ډالره به یې خپلو همکارو سازمانونو ته ورکړي.
د امریکا د ولسمشر په توګه د ډونالډ ټرمپ تر واکمنېدو وروسته واشنګټن خپلې بهرنۍ مرستې په بې سارې توګه کمې کړي دي.
د راپورونو پربنسټ، د امريکا حکومت له مرستندویه سازمانونو سره د همکارۍ شاوخوا ۸۰ سلنه قراردادونه لغوه کړي دي.