د افغانستان متحدې جبهې په یوه خبرپاڼه کې په ایران او پاکستان کې د افغان کډوالو د جبري اېستلو په غبرګون ښودلی دی او ویلي یې دي، چې «کډوال باید د طالبانو د کړنو سرا ونه ویني» په خبرپاڼه کې راغلي چې د پاکستان له خوا د افغان کډوالو جبري شړل غیر انساني اقدام دی.
د جنرال سمیع سادات په مشرۍ د افغانستان متحده جبهې نن د وري په ۱۶مه د یوې خبرپاڼې خپرولو سره لیکلي، پاکستان هغه کورنۍ په نښه کوي چې د طالبانو افراطي رژیم له ظلم، فقر او بشري فاجعې تښتېدلې دي.
دغه جبهې د ایران او پاکستان له حکومتونو غوښتي چې د اسلامي ارزښتونو او بشري حقونو پر بنسټ له افغان کډوالو سره انساني چلند وکړي.
دوی زیاتوي چې پاکستان د تېرو لسیزو په اوږدو کې افغانانو ته پناه ورکړې وه او دوی غوښتنه کړې چې یاد هېواد دې د انسان دوستۍ لارې ته دوام ورکړي نه دا چې «د خپلو ظالمانه سیاسونو له لارې د افغانانو انساني کرامت او امنیت له منځه یوسي.»
دغه جبهې پر افغانانو غږ کړی، چې په دې سخت وخت کې د خپلو افغانانو سره یو موټی شي او د عدالت لپاره غږ پورته کړي او یا هم مستقیمې مرستې ورسره وکړي.
په خبرپاڼه کې لیکل شوي:« طالبان نه ویوازې خپلو دروغجونو ژمنو خپلو لابیګرانو او ملاتړو ته وفادار پاتې نشول بلکې د افغان ولس لپاره یې لا نور ظلم، رټل او بې ځایه کېدل رامنځته کړل.»
دوی همدراز ویلي چې دغه جبهه د طالبانو پرضد فعالیتونه کوي ترڅو افغانستان د ټولو افغانانو او نړۍ لپاره یو خوندي کور شي.
پاکستان د ۲۰۲۳کال له اکتوبر میاشتې راهیسې له دغه هېواده څه باندې ۸۰۰زره کډوال په جبري توګه افغانستان ته ستانه کړي دي.
هغه انځورونه او ویډیوګانې چې افغانستان انټرنشنل ته رارسېدلې پکې ښکاري چې له پاکستانه اېستل شوي افغان کډوال د خپلو کورونو توکي په کراچیو کې لېږدوي.
د معلوماتو له مخې د موټر پاس په نامه په پېښور کې د طالبانو تر واک ولاندې د افغانستان کونسلګري او په افغانستان کې د پاکستان سفارت په کډون د کونسلګریو له خوا صادریږي.
ځايي سرچینې وايي موټر چلوونکي اړه دي چې د دې پاس ترلاسه کولو لپاره داوړو خواوو ته ۲ سوه ډالره فېس تحویل کړي.
ځینې موټر چلوونکي وايی چې دا پیسې دوی له افغان کډوالو اخلي او دا په کرایه کې حسابوي خو ځینې کډوال ددې پیسو د ورکړې توان نه لري او دوی مجبور دي چې د توکو بار موټر په تورخم کې خالي کړي.
په تورخم کې د افغانستان انټرنشنل خبریال هم وايي چې د دې سند نشتوالي له امله باري موټر نشي کولی چې له کرښې واوړي.
افغان کډوال وايي چې پاکستاني او طالب چارواکي دې په دې برخه کې اسانتیاوې راولي او دا فېس دې داوړه خوا معاف شي او پرته له کوم سند دې موټرو ته د تګ او بېرته راتګ اجازه ورکړي.
ددې پاس لرونکي کولی شي چې د موټر چلوونکی او یوه همکار سره پرته د پاسپورټ او وېزې تګ او راتګ وکړي.
د افغان کډوالو شکایتونه دا هم دي، چې د پاکستان د حکومت له لوري جوړ شوي کېمپونو کې یې مالونه په زوره ګرځول کېږي او پاکستاني ځواکونه ورته اجازه نه ورکوي چې خپل د کورونو توکي له ځانونه سره انتقال کړي.
هغه ویډیوګانې چې په ټولنیزو رسنیو کې لاس په لاس کېږي پکې لیدل کېږي، پاکستاني ځواکونه ورته د خپلو د کورونو د توکو د وړلو اجازه نه ورکوي.
افغانان د پاکستان او له طالب چارواکو غواړی چې د دغو توکو په برخه کې ور سره همکاري وکړي.