د بریتانیا یوې محکمې د فرشته جامي په نوم ۳۶ کلنه افغان مېرمن له داعش سره د یوځای کېدو په تور مجرمه ګڼلې او په عمر بند یې محکومه کړې. فرشته جامې به لږ ترلږه به ۱۷ کاله په زندان کې تېروي.
بریتانوي رسنیو د پنج شنبې په ورځ راپور ورکړی، چې د بربتانیا د سټراټفورډ-اوپن ـ ایون ښار اوسیدونکې ۳۶ کلنه افغان توکمه مېرمن د لیسټر کرون محکمې له خوا د ترهګرۍ لپاره د چموالي له امله په دوو تورونو مجرمه وبلل شوه او د ترهګرۍ قانون د ۵مې مادې له مخې د محکمې له خوا د عمر بند سزا ورکول شوه.
محکمې ویلي، چې مېرمن جامي غوښتل ځان «شهید» کړي.
د لیسټرن کرون محکمې قاضي ویلي، چې دغې ښځي افغانستان ته د تلو لپاره د الوتنې د یو طرفه ټیکیټو لپاره ۱۲۰۰ پونډ ساتلي وو او د دوو اونیو په جریان کې یې افغانستان ته د الوتنو په اړه ۲۲ ځله پلټنه کړې وه.
د راپورونو له مخې پولیسو د دغې مېرمنې د کور د پلټنو پرمهال سیمکارټونه، نغدې پیسې او د پاسپورټونو د پټولو د هڅو نښې موندلې وې.
پولیسو د پلټنو پرمهال دا ثابته کړې ، چې مېرمن جامي د ۲۰۲۲ کال څخه تر ۲۰۲۴ کال پورې تاوتریخوالي ډکې ویډیوګانې هم پر انټرنیټ خپرې کړې وې.
د ویسټ میډلنډرز د ترهګرۍ ضد پولیسو مشره الیس هورسټ وايي:«جامي لا د ۲۰۲۳م کال د جولای په میاشت کې د سفر نیت څرګند کړی واو تر نومبر پورې یې د پام وړ اندازه نغدې پیسې راټولې کړې وې چې د هغې د پریکړې ثبوت دی. یوازې په دوو اونیو کې هغې ۲۲ ځل افغانستان ته د سفر لپاره د الوتنو پلټنه کړې وه چې ډېر یې د ځان او خپلو ماشومانو لپاره یو طرفه ټکټونه وو.»
خو وړاندې مېرمن جامي ادعا کړې وه، چې افغانستان د سفر هدف یې له خپلي کورنۍ سره لیدل و، خو وروسته نوموړې خپله دغه ادعا په ثبوت ونه رسوله.
فرشته جامي په افغانستان کې زیږیدلې او په ۲۰۰۸ کال کې برېتانیا ته کډه شوي.
نوموړې په ۲۰۲۳ کال کې له خپل خاوند څخه جلا شوي او د خپلو څلورو ماشومانو سره د سټراټفورډ-اوپن ـ ایون ښار کې اوسیده.
