د روسیې ولسمشر ولادیمیر پوتین په اوکرایین کې د درېشو ساعتونو لپاره د ایسټر یو اړخیز اوربند اعلان کړ او خپلو ځواکونو ته یې امر وکړ، چې د ماښام په شپږو بجو جګړه پای ته ورسوي.
د اوکراین ولسمشر ولادیمیر زېلېنسکي د شنبې په ورځ په ټولنیزو رسنیو کې د روسیې د ولسمشر ولادیمیر پوتین له خوا وړاندیز شوي اوربند ته په شک سره غبرګون وښود او هغه یې د "انساني ژوند سره په لوبې" تورن کړ.
زېلېنسکي د اوربند د وړاندېز د منلو په اړه څه نه دي ویلي، خو په اېکس یې لیکلي "زموږ په اسمان کې د بې پیلوټه الوتکو بریدونه د ایسټر او د انساني ژوند په اړه د پوتین ریښتینی چلند څرګندوي،"
پوتین په کرملین کې د خپل پوځي مشر ویلري ګیراسیموف سره په خبرو کې وویل: "د بشردوستانه ملحوظاتو پراساس، روسیه د ایسټر اوربند اعلانوي. زه د دې مودې لپاره د ټولو نظامي فعالیتونو د بندولو امر کوم."
پوتین زیاته کړه: "موږ فکر کوو چې اوکراین به زموږ مثال تعقیب کړي. په ورته وخت کې، زموږ سرتېري باید د اوربند د احتمالي سرغړونو او د دوښمن له خوا د هر ډول تېري کوونکو اقداماتو د مخنیوي لپاره چمتو وي."
د روسیې د دفاع وزارت ویلي، چې د "ځانګړو پوځي عملیاتو" په سیمه کې یې ټولو ډلو قوماندانانو ته د اوربند په اړه لارښوونه کړې.
د روسیې د بهرنیو چارو وزارت په یوه بیان کې ویلي، روسي ځواکونه به اوربند ته غاړه کېږدي، په دې شرط چې اوکراین یې "متقابل درناوی" وکړي.
د اوکراین د بهرنیو چارو وزیر د شنبې په ورځ وویل، چې اوکراین د ایسټر د اوربند د اعلان په اړه د روسیې پر ولسمشر ولادیمیر پوتین باور نه شي کولی او زیاته یې کړه، چې کییف د دېرش ورځني اوربند د مراعات لپاره پر خپل اصلي تړون ولاړ دی.
د اوکراین د بهرنیو چارو وزیر اندري سیبیها په خپل اېکس لیکلي: "د اوکراین دریځ روښانه او ثابت دی: د مارچ په ۱۱ په جده کې موږ په غیر مشروط ډول د ۳۰ ورځو لپاره د بشپړ لنډمهاله اوربند لپاره د متحده ایالاتو وړاندیز سره موافقه وکړه."
