د طالبانو د بلخ والي دفتر نه په خپره شوې خبرپاڼه کې راغلي، چې د ازبکستان هېواد د کرنې وزارت مرستیال عبدالزخروف جمشید او تخنیکي ټیم یې د طالبانو د بلخ والي یوسف وفا سره وکتل. عبدالزخروف جمشید په دې ناستې کې ویلي، چې پر امو سیند د تحکیماتو د جوړېدو عملي چارې پیل شي.
د طالبانو د بلخ والي دفتر د سې شنبې په ورځ، د غويي ۹مه وویل، چې راغلي پلاوي د ازبکستان هیواد او افغانستان ترمنځ ګډ سیند له تحکیماتو څخه له نژدې لیدنه وکړه او له طالب چارواکو سره یې د امو سیند د تحکیماتو په اړه خبرې کړې دي.
ازبکستان د قوشتیپې کانال له اړخه اندېښمن دی او غواړي چې طالبان په شګلنو سیمو کې د اوبو د جذب مسالې ته ځېر کړي او په دې برخه کې همکاري ورسره وکړي.
طالبانو د ازبکستان د کرنې وزارت مرستیال عبدالزخروف جمشید په حواله لیکلي:«د امو سیند د تحکیماتو اړوند ډېر ژر عملي ګامونه واخیستل شي او د مقبرې په څلورو طرفونو کې به ځنګل ته ورته ځای ددې تخنیکي ټیم په ملتیا جوړ کړل شي.»
د طالبانو د بلخ والی دفتر په خبرپاڼه کې لیکلي چې په دې لیدنه کې د زراعت پراختیا، زراعت برخه کې د پانګوني، د افغانستان د تازه میوو لپاره نړیوالې بازار موندني، د امو سیند د تحکیماتو، د سبزیجاتو او میوه جاتو دوا پاشي « پومیګیشن » په اړه خبرې شوې دي.
