عمان ۹ تنه افغان بندیان له خپلو زندانونو خوشي کړل
د طالبانو د بهرنیو چارو وزارت وايي، د عمان د پاچا د ځانګړي فرمان پر بنسټ، ۹ تنه خوشي شوي، چې شپږ تنه یې افغانستان ته راستانه شوي.
د طالبانو د بهرنیو چارو وزارت وايي، د عمان د پاچا د ځانګړي فرمان پر بنسټ، ۹ تنه خوشي شوي، چې شپږ تنه یې افغانستان ته راستانه شوي.
د طالبانو د بهرنو چارو وزارت د یوې خبرپاڼې په خپرولو سره ویلي، چې د عمان شاهي حکومت د پاچا هیثم طارق ال سعید د کوچني اختر د مبارکې ورځې په پار صادر شوي ځانګړي فرمان پر بنسټ ۹ تنه افغان بندیان خوشي شول.
د طالبانو د بهرنیو چارو وزارت ویلي، چې د یادو افغان کډوالو له ډلې یې شپږ تنه افغانستان ته راستانه شوي او پاتې درې تنه به هم ډیر ژر هېواد ته راستانه شي.
طالبانو د عمان له زندان څخه ازادو شویو ۹ تنو افغان بندیانو نومونه هم په ډاګه کړي دي.
طالبانو د یادو افغان بندیانو د خوشې کېدو له امله د عمان شاهي حکومت څخه د نورو همکاریو غوښتنه کړې.
د طالبانو تر واک لاندې د چاپېریال ساتنې ملي ادارې عمومي رییس مطیع الحق خالص په کابل کې د جاپان له سفیر سره د لیدنې پرمهال غوښتنه کړې، چې د اقلیم بدلون په ۳۰مه نړیواله غونډه کې دغه ډلې ته د ګډون زمینه برابره کړي.
د طالبانو تر واک لاندې د چاپیریال ساتنې ملي ادارې له لوري په خپره شوې خبرپاڼه کې راغلي، چې مطیع الحق خالص د جاپان له سفیر تاکایوشي کورومییا سره د لیدنې پرمهال د چاپېریالي موضوعاتو په اړه خبرې کړې.
خالص په دې لیدنه کې له جاپان څخه غوښتنه کړې، چې له چاپېریالي کنوانسیونونو غوښتنه وکړي، څو د افغانستان ځنډول شوې چاپېریالي پروژې بیا پیل شي او افغانستان ته د فعال غړي په توګه په ټولو نړیوالو غونډو کې بلنه وکړل شي.
واک ته د طالبانو له رسېدو وروسته د افغانستان ګڼې چاپېریالي پروژې ځنډول شوې دي.
همدارنګه د طالبانو تر واک لاندې د چاپیریال ساتنې ملي ادارې رییس له جاپان څخه غوښتنه کړې، چې د اقلیم بدلون په ۳۰م نړیوال کنفرانس کې دې دغې ډلې ته د ګډون برابره کړي، څو له اقلیمي بدلون سره د جوړښت په برخه کې ځانګړې شوې بودجې ته لاسرسی پیدا کړي.
د اقلیم بدلون نړۍوال کنفرانس ۳۰ مه ناسته (COP-30) د روان کال په نومبر میاشت کې د برازیل په بیلم ښار کې ترسره کیږي. په دغه کنفرانس کې د نړۍ هېوادونه راټولیږي او د اقلیم بدلون پروړاندې ګډې پرېکړې کوي.
مطیع الحق خالص ویلي:«جاپان باید د چاپېریالي تجهیزاتو، د ظرفیت لوړونې لنډ مهاله او اوږدمهاله پروګرامونو په جوړولو کې له افغانستان سره مرسته وکړي.»
د طالبانو د چاپیریال ساتنې ادارې ویلي، چې د جاپان سفیر د افغانستان ځنډول شويو چاپېریالي پروژو د بیا پیل په اړه د همکارۍ ژمنه کړې ده.
طالبان وايي، افغانستان په نړیواله کچه د اقلیمي بدلون له ناوړه اغېزو څخه شپږم متضرر هېواد دی.
د افغانستان د کورنيو چارو پخوانی وزير عمر داودزي پر اېکس پاڼه پوښتلي، چې که د طالبانو په شتون کې د قدرت جزيزې او پاټکونه ختم شوي وي، نو د غور په تیورې ولسوالۍ کې د عابدې په نوم د نجلۍ د ځان سوځولو کیسه څه ده؟
نوموړي لیکلي، ګوري، چې د دې قضيې په برخه کې «طالبان عمري عدالت پلی کوي او که عوام فریبي کوي.»
عمر داودزي د غور په تيورې ولسوالۍ کې د عابدې په نوم د يوې نجلۍ د ځان سوځونې پېښې ته په اشارې طالبانو ته د پېغور په ډول ليکلي: « وایي دقدرت جزیرې ختمې شوې دي، پاټکونه نور نشته، زورګویۍ ته دپای ټکۍ ایښودل شوی. اداره یوه لاس کې ده. دامیر فرمان په ټول ملک کې نافذ دی. نو د غور د عابدې د ځان سوځولو کیسه څه ده؟»
پرون د عابدې په نوم يوې نجلۍ د غور ولایت په تيورې ولسوالۍ کې وروسته له هغه ځان ته اور اچولی، چې یو طالب قوماندان غوښتل په زور یې خپل ورور ته واده کړي.
سرچينې وايي، چې طالب قوماندان له وسلو سره د نجلۍ کور ته ورغلی و او تر ګواښ وروسته نجلۍ ځان هغوی ته تسلیم نه کړ او ځان ته یې اور واچاوه.
د طالبانو د کډوالو او راستنېدونکو چارو وزير مولوي کبير د یوناما له مشرې سره په ليدنه کې غوښتنه کړې، چې د ملګرو ملتونو اړوند سازمانونه دې د افغان کډوالو د ښارګوټو په رغولو کې ونډه واخلي. طالبانو په یو شمېر سيمو کې د افغان کډوالو لپاره د ۵۸ ښارګوټو جوړولو خبر ور کړی.
د طالبانو تر واک لاندې ملي ټلویزیون د چهارشنبې په ورځ په یوه خبرپاڼه کې ويلي، چې مولوي کبیر په افغانستان کې د یوناما د مشرې روزا اوتنبایوا سره په ليدنه کې د افغان کډوالو، بې ځایه شويو کورنيو او اړوند نوور موضوعاتو په اړه خبرې وکړې.
په خبر کې د یونامامشرې له قوله ويل شوي، چې له کډوالو سره د لاسنیوي په موخه به مالي امکانات را جلب کړي.
د طالبانود کډوالو او بیرته راستنېدونکو چارو وزير مولوي کبير د مرستو غوښتنه کړې ده.
نوموړي ویلي، «تر دې دمه د کډوالو لپاره ۵۸ ښار ګوټي په پام کې نیول شوي دي او د ملګرو ملتونو سازمانونه دې د مهاجرینو د ښارګوټو په رغولو کې ونډه واخلي.»
د خپرو شويو شمېرو له مخې، له پاکستان نه د تېرې یوې میاشتې په لړ کې ټولټال ۳۱۰۹۸ د اې سي سي کارت لرونکي او ۱۹۰۵۶ بې اسناده کډوال د تورخم له لارې افغانستان ته ستانه شوي دي.
په ټوله کې شاوخوا ۵۰۱۵۴ کسان له پاکستان نه د اېستلو په دویم پړاو کې د تورخم له لارې افغانستان ته ستانه شوي دي.
افغانستانه ته ستنې شوي کورنۍ د امکاناتو له نشتوالي شکایت کوي.
د طالبانو د اطلاعاتو او فرهنګ وزارت د فرهنګ او هنر مرستیال عتیق الله عزيزي وایي، چې پر هغو کتابونو بندیز دی، چې «د اسلامي او افغاني ارزښتونو پر خلاف دي او ملي یووالي ته زيان رسوي.» نوموړي له لیکوالانو غوښتي، چې د خاصو خلکو د ستاينې پر ځای د ټولنې واقعیتونه وليکي.
د طالبانو د اطلاعاتو او کلتور وزارت د کلتور او هنر مرستيال عتیق الله عزيزي د چهارشنبې په ورځ د کتاب ټولونې په يوه غونډه کې ویلي، چې د ټولو کتابونو پر چاپ او پلور بنديز نشته او یوازې پر هغو کتابونو بندیز دی، چې له افغاني ټولنې او کلتور سره په ټکر کې وي.
نوموړي زياته کړې چې «پر کتابونو دغه بندیز د ولس د ارادو پر بنسټ شوی او هغه کتابونه بند شوي، چې د مسلمانانو وحدت ته زیان رسوي.»
عزيزي له لیکوالانو غوښتي، چې د ولس عظمت، ژبو او ادبیاتو ته قایل واوسي او د ټولنې رښتیني واقعیتونه وړاندې کړي.
هغه ټينګار کړی، چې لیکوالان دې له هغو لیکنو ډډه وکړي، چې د یوې ژبې، قوم او شخص د ستاينې لپاره لیکل کیږي.
د طالبانو د اطلاعاتو او فرهنګ وزارت درې میاشتي وړاندې کتاب پلورونکو ته امر کړی، چې د «اسلامي ارزښتونو خلاف» کتابونو له چاپ او خپراوي ډډه وکړي.
یاد وزارت ویلي و، چې په ټولو ولایتونو کې د «منع شویو کتابونو» د راټولولو بهیر دوام لري.
د طالبانو دغو بندیزونو ته لیکوالانو او د کتاب مینه والو سخت غبرګونونه ښودلي دي.
دوی نیوکې کړې چې د طالبانو د سخت دریځو افکارو او د بیان پر ازادۍ د بندیز له کبله اوس هېڅوک لا په خپله خوښه مطالعه هم نه شي کولای او خلک اړ باسي چې د طالبي افکارو لرونکي کتابونه ولولي.
یو پخوانی افغان سرتېری، چې په افغانستان کې یې له امریکایي ځواکونو سره همکاري درلوده، د امریکا په هوسټن ښار کې د پارکنګ پر سر تر لفظي شخړې وروسته په ډزو وژل شوی. پولیس وایي، بریدګر له پېښې وروسته خپله د پولیسو مرکز ته ورغلی او له څارنوالۍ سره تر سلا مشورې وروسته خوشی شوی دی.
د هوسټن پولیسو لهخوا خپاره شوي معلومات ښيي چې شکمن کس له ډزو وروسته پخپله پولیسو ته ځان تسلیم کړی او د پېښې په اړه یې معلومات ورکړي دي.
پولیسو له هغه څخه وسله ضبط کړې او تر پوښتنو ګروېږنو او د څارنوالۍ له دفتر سره تر مشورې وروسته پرېکړه شوې چې بې توره خوشی شي.
د پولیسو په وینا، عبدالرحمان وزیري چې ۳۱ کلن و، د یکشنبې په ورځ خپل موټر د یو اپارتمان مخې ته د پوست بکسونو ترڅنګ درولی و چې له یو بل موټر چلوونکي سره یې پر دې خبره لفظي شخړه پیل شوه.
د پولیسو د رپوټ له مخې، تر شخړې وروسته، بریدګر پر وزیري څو ډزې وکړې چې له امله یې هغه سخت ټپي شو او په پای کې یې خپل ژوند له لاسه ورکړ.
عبدالله خان، چې د وژل شوي ورور دی، له محلي رسنیو سره په خبرو کې وویل چې دوی د امریکا له پوځ سره تر همکارۍ وروسته د خوندي ژوند لپاره امریکا ته کډه کړې وه.
عبدالله خان وزیري وویل: «موږ له افغانستان نه راغلي وو ځکه چې موږ د امریکا له حکومت سره مرسته کوله. زما ورور له ځانګړو ځواکونو سره کار کاوه او د عملیاتو پر مهال یې د ډلې مشري کوله. موږ دلته د امنیت لپاره راغلي وو، خو اوس دا ځای هم زموږ لپاره خوندي نه دی».
وزیری له خپلې مېرمنې او دوو وړو لوڼو سره په یوه اپارتمان کې اوسېده.
په خپرو شویو ویډیوګانو کې ښکاري چې د پېښې په ځای کې د وزیري سپین موټر د پوست بکسونو مخې ته ولاړ دی او د خطر څراغونه یې لا هم بل دي.
د پولیسو په وینا، له لفظي شخړې وروسته بریدګر پر وزیري ډزې وکړې. پولیس وایي چې وزیري څو ځله په مرمیو ویشتل شوی او له ټپونو مړ شوی.
د هوسټن پولیسو تایید کړې چې پلټنې لا هم روانې دي او اړتیا ده چې د نظارتي کمرو ویډیوګانې وڅېړل شي څو لا نور معلومات تر لاسه شي.