طالبانو د جاپان او اسیا پراختیایي بانک څخه د همکارۍ غوښتنه کړې

د طالبانو د مالیې وزارت وایي، چې د دغه وزارت مرستیال د جاپان له سفیر او اسیا پراختیایي بانک له مشر ډیوېډ هېل سره په لیدنه کې د لا ډېرو همکاریو غوښتنه کړې ده.

دغه وزارت په یوې خپرې کړې خبرپاڼه کې ویلي، چې په یاده ناسته کې په افغانستان کې د اسیا پراختیایي بانک او د جاپان هېواد له لوري د پلي شویو پروژو د اغېزمنتیا په اړه خبرې شوې دي.
خبرپاڼه زیاتوي، چې د ډیوېډ هېل او د جاپان سفیر ډاکټر تاکایوشي کورومیا ډاډ ورکړی چې د لا نورو پروژو په عملي کولو کې به د یاد وزارت سره خپلو مرستو ته دوام ورکړي.
بل خوا د خوړو نړۍوال پروګرام وایي، چې د جاپان حکومت په افغانستان کې د خوړو له ناورین او خوارځواکۍ سره د مبارزې لپاره له دغه سازمان سره ۷ مېلیونه ډالره مرسته کړې ده.
د خوړو نړۍوال پروګرام په خپره کړې اعلامیه کې راغلي، دغه مالي مرسته د هغو وګړو د ملاتړ لپاره ده چې د بشري او خوراکي ناورینونو څخه اغېزمن شوي او د درېیو میاشتو لپاره به په ټول افغانستان کې د درېیو زرو کورنیو مساوي ملاتړ وکړي.
دغه سازمان زیاتوي، چې له دغې مرستې سره به وکولای شي کورنیو ته او په ځانګړې توګه مېندوارو او شیدې ورکوونکو مېندو او په خوارځواکۍ اخته ماشومانو ته د خوړو مرستې چمتو کړي.
د یادولو وړ ده، چې د جاپان حکومت له ۲۰۲۱ کال راهیسې په افغانستان کې د بېلابېلو بشري او بېړنیو خوراکي مرستو پروګرامونو لپاره ۹۳ مېلیون ډالره مرسته کړې ده.