مایکروسافټ د سکایپ خدمتونه د تل لپاره پای ته ورسول
مایکروسافټ خپلو سکایپ کاروونکو ته خبر ورکړی، چې له دې وروسته کولی شي خپلو خبرو اترو او اړیکو ته د دوام ورکولو لپاره مایکروسافټ ټیمز (Microsoft Teams) نه استفاده وکړي.
مایکروسافټ خپلو سکایپ کاروونکو ته خبر ورکړی، چې له دې وروسته کولی شي خپلو خبرو اترو او اړیکو ته د دوام ورکولو لپاره مایکروسافټ ټیمز (Microsoft Teams) نه استفاده وکړي.
سکایپ د دوشنبې په ورځ (د می ۵مه) د ۲۲ کلونو خدمت وروسته د تل لپاره بند شو.
مایکروسافټ ویلي، چې د ټیمز وړیا نسخه اوس د ټولو لپاره شته او کاروونکي کولای شي د خپلو سکایپ حساب معلوماتو په وسیله پکې داخل شي.
د دوی په وینا، د ننوتلو وروسته ټول پخواني چتونه او اړیکې به ورته چمتو وي.
همداراز، هغو کسانو ته چې نهغواړي ټیمز ته انتقال شي، سکایپ دا اسانتیا برابره کړې چې کولی شي خپل معلومات، اړیکې او چټ تاریخ یا صادر کړي یا یې ړنګ کړي.
مایکروسافټ ویلي: «موږ د خپلو کاروونکو ملاتړ ته ژمن یو. د دې بدلون د اسانه کولو لپاره مو ویډیوګانې، مرحلهوار لارښود او عامې پوښتنې چمتو کړي دي.»
د سکایپ ټیم د خپلو کاروونکو نه د کلونو ملاتړ ستاینه کړې او زیاته کړې یې ده: «سکایپ د ډېرو خلکو د مهمو شېبو یوه نه هېرېدونکې برخه پاتې شوې او موږ ویاړو چې د دې سفر برخه وو.»
سکایپ په ۲۰۰۳ کې په کار پیل وکړ چې بیا په ۲۰۱۱ کې د ۸.۵مېلیارد ډالرو په ارزښت د مایکروسافټ له خوا واخیستل شو.
مشهور سافټویر سکایپ د ویډیو زنګونو په فعالولو سره د اړیکو په لاره کې انقلاب راووست، خو د رقابت له توانه په لوېدو وتړل شو.
متحده ایالات د دې ارزونه کوي چې ښايي د Nvidia شرکت مصنوعي ځیرکتیا چېپونه متحده عربي اماراتو باندې د پلور محدودیتونه نرم کړي. ولسمشر ډونالډ ټرمپ ممکن د خلیج سفر پر مهال د اماراتو سره د چپونو یوه دوه اړخیزه هوکړه اعلان کړي.
تر اوسه پرېکړه نه ده شوې، خو په سپینه ماڼۍ او سوداګرۍ وزارت کې دې بحثونه زور اخیستی.
له موضوع خبرې سرچینې چې نوم یې ندی یاد شوی وايي چې ولسمشر ډونالډ ټرمپ ښايي د خلیج هیوادونو ته د خپل راتلونکي سفر پر مهال د دواړو هیوادونو ترمنځ د چېپ (semiconductor) یوه دوه اړخیزه هوکړه اعلان کړي.
ټاکل شوې ده چې ټرمپ د مۍ پر ۱۵مه اماراتو ته سفر وکړي.
مګنیزیم یو مهم منرال دی چې د روغتیا په ډېرو برخو کې رول لري. څېړنې ښيي، چې مګنیزیم کولای شي د وینې شکر کنټرول کړي، د مایګرېن (شدید سردرد) مخه ونیسي، د وینې فشار راکم کړي او د خپګان مخنیوي کې مرسته وکړي.
که مګنیزیم له خوړو سره وخوړل شي، د ځینو ناوړه اغېزو مخه نیولی شي.
همداراز، دا درمل باید د نورو درملو د وخت پر بنسټ وخوړل شي، خو تر ټولو مهمه خبره دا ده چې دوامداره وي.
د مګنیزیم لپاره وړاندیز شوی ورځنی مقدار د لویانو لپاره ۳۱۰–۴۲۰میلی ګرامه دی.
ډېری خلک دا اړتیاوې له خوړو پوره کولی شي، خو په ځینو حالتونو کې سپلیمېنټ ته اړتیا پیدا کېږي.
ایا د مګنیزیم د خوړلو لپاره وخت مهم دی؟
که تاسو مګنیزیم د خپل وضعیت د ښه کولو، اضطراب کمولو یا د خوب د کیفیت د لوړولو لپاره خورئ، باید پوه شئ چې دا ګټې د اوږدمهاله استعمال سره تړاو لري.
د بېلګې په توګه، په یوه څېړنه کې چې ۱۳۰مایګرېن لرونکي (شدید سردرد لرونکي) کسان پکې شامل وو، معلومه شوه چې د مګنیزیم لرونکي سپلیمېنټ خوړل د مایګرېن پېښې کمې کړې. ګډونوالو وویل، چې د درېیو میاشتو په موده کې د مایګرېن ورځو شمېر کم شوی و.
بله څېړنه ښيي، چې مګنیزیم د خپګان نښې په ۱۱۲ لویانو کې کمې کړې وې، چې د دوه اونیو په موده کې یې اغېز څرګند شوی و.
یوې بلې څېړنې چې په ۴۶لویانو ترسره شوې وه، ښيي چې هره ورځ ۵۰۰میلی ګرامه مګنیزیم د اته اونیو لپاره خوړل د بې خوبې نښې لکه د خوب وخت ښه کړي دي.
نو، مګنیزیم هر وخت خوړل کېدای شي، خو باید منظم او دوامداره وخوړل شي.
ځینو ته د سهار له خوا خوړل یې اسانه وي او نور ښايي دا غوره وګڼي چې د ماښام له خوړو یا له خوب مخکې یې وخوري.
ایا له خوړو سره وخوړل شي؟
که څه هم مګنیزیم عموماً ښه هضم کېږي، خو ځینې ناوړه اغېزې لرلای شي.
تر ټولو عامې اغېزې یې د هاضمې ستونزې دي، لکه نسناستی، زړه بدوالی یا استفراق.
که تاسو له دې نښو سره مخ شئ، نو مګنیزیم حتماً له خوړو سره وخورئ، خو که دغه نښې بیا هم وې د روغتیا له یوه متخصص سره مشوره وکړئ.
په پای کې بیا هم یادونه کوو، چې د مګنیزیم ګټې د اوږدمهاله خوړلو سره تړلي دي او دا سپلیمېنټ هر وخت خوړل کېدای شي، خو د سهار پر مهال یې خوړل ستاسو انرژي ډېروي او د ماښام مهال مو خوب ښه کوي.
امازون شرکت د خپلې فضایي انټرنټي شبکې «کویپر» د پیل په لړ کې، د دوشنبې په ورځ ۲۷سپوږمکۍ د امریکا د فلوریډا له کیپ کاناورال فضایي مرکز څخه فضا ته وتوغولې.
دا د امازون د ۳،۲۳۶ سپوږمکیو له پلان څخه لومړۍ ډله ده، چې موخه یې د نړۍ لرې پرتو او کلیوالو سیمو ته د چټک انټرنېټ برابرول دي.
یادې سپوږمکۍ د «یونایټیډ لانچ الاینس» د اتلس توغندي له لارې فضا ته پورته شوې. د توغولو دا ماموریت، چې مخکې د خرابې هوا له امله ځنډېدلی و، له سټارلېنک سره د سیالۍ لپاره مهم ګام بلل شوی.
د امازون د دې پروژې ټول ارزښت ۱۰میلیارده ډالر اټکل شوی او شرکت مکلف دی چې د ۲۰۲۶ تر نیمایي پورې لږ تر لږه ۱،۶۱۸ سپوږمکۍ فضا ته واستوي.
شرکت هیله لري چې د روان کال تر پایه خپلې انټرنټي چارې پيل کړي. امازون مخکې له دې دوه ازمویښتي سپوږمکۍ هم فضا ته لېږلې وې.
د امازون بنسټګر جېف بیزوس ویلي: « د انټرنټ لپاره تقاضا بې پایه ده. زموږ باور دا دی چې هم سټارلېنک او هم کویپر دواړه بریالي وي».
د کویپر له لوري به کاروونکو ته ځانګړي انټنونه وړاندې شي، چې بیه به یې له ۴۰۰ ډالرو کمه وي. شرکت تمه لري چې میلیونونه دستګاوې تولید کړي.
د بدن د اوبو کمښت بېلابېل لاملونه لري. کله چې مو بدن د اوبو له کمښت سره مخ وي بدن مو درته ځینې نښې ښیي. په ورځنیو بوختیاوو کې د کافي اوبو څښل ډېر اسانه هېریږي، په ځانګړي ډول د ګرمۍ په موسمونو کې د بدن د اوبو د کمښت (ډي هایډرېشن) خطر ډېر زیاتېږي.
خو یواځې ګرمي نه، بلکې نور عوامل هم د بدن د اوبو د کمښت لامل ګرځي لکه: نس ناستی، کانګې، ډېر تشناب ته تګ، تبه، یا لږې اوبه څښل.
مهمه خبره دا ده چې د بدن د اوبو د کمښت لپاره دا اړینه نه ده چې ډېرې اوبه له لاسه ورکړئ؛ حتا که د بدن د اوبو کچه ۱.۵سلنه راټیټه شي، نو ډي هایډرېشن پیلېږي.
کله چې د بدن اوبه کمې وي لاندې نښې ښیي:
د خولې بد بوي
که مو له خولې بد بوی ځي، دا هم ښايي د اوبو د نه څښلو له امله وي. د خولې لعاب جراثیم وژونکي خاصیت لري، خو د اوبو کمښت له امله خوله وچیږي او بکتریاوې ډېريږي.
د شاتو یا خوږو خوراک غوښتنه
دا به تاسې ته حیرانوونکې وي، خو کله ناکله د بدن د اوبو د کمښت پر مهال د تندې پر ځای د وږي کېدو احساس پیدا کېږي، په ځانګړي ډول د خوږو خوړلو غوښتنه زیاتیږي.
دا ځکه چې د بدني فعالیتونو له امله بدن کاربوهایډرېټونه ډېر ژر مصرفوي او بیا د شاتو یا خوږو غوښتنه پیدا کېږي.
د بدن وچ پوستکی
که کافي اوبه ونه څښل شي، د پوستکي روغتیا ته زیان رسېږي او وچېږي. ډي هایډرېشن د پوست د ځلا کمښت، ګونځو او د سترګو شاوخوا حلقو ته لاره هواروي.
تاسې کولی شئ د یوې ازموینې له لارې دا معلومه کړئ چې د بدن پوستکی مو وچ دی یا نه د ګوتو شا ته یا د پوستکي یوه برخه لږه ګونځې ونیسئ. که سمدلاسه بېرته خپل حالت ته راستنه نه شوه، نو دا د اوبو د کمښت نښه ده.
ستړیا
که غرمه مهال یا مازیګر مهال د ډېرې ستړیا، خوبولي حالت، یا سستي احساس کوئ، دا هم ښايي د اوبو د کمښت له امله وي. ډي هایډرېشن د انرژۍ کمښت ته لاره هواروي او فزیکي کارونه درانه ښکاره کوي.
خپګان یا غصه
د غوسې په حالت کې کله چې مو حالت خرابیږي، نو د چیغو وهلو پر ځای یو یا دوه ګیلاسه اوبه وڅښئ. اوبه نه څښل حالت او ذهن ناراموي.
لړزه یا د سړو احساس
دا به عجیب ښکاري، خو د اوبو کمښت له امله حتی په ګرمو ورځو کې هم تاسو د یخوالي احساس کوئ او یخ مو کیږي. ځکه بدن د پوستکي د وینې جریان کموي او اوبه د تودوخې د ساتلو مهم رول لري.
د عضلو ستونزې
کله چې بدن کې اوبه کمې شي، نو د وینې جریان ورو کېږي، عضلې کلکېږي. بدن هڅه کوي مهمو غړو ته اوبه ورسوي او نورو برخو ته یې کموي.
سر ګرځېدل
کله چې بدن کې اوبه کمې وي د عضلو تر څنګ، مغز ته هم وینه سمه نه رسېږي او دا د سر ګرځېدو لامل کېږي.
دا یوه جدي نښه ده چې باید روغتون ته مراجعه وشي.
سر درد
د اوبو کمښت کولی شي د "سیروټونین" هارمون کچه ګډه وډه کړي چې د سر درد سبب ګرځي. که سر مو درد کوي، نو د درملو له خوړلو مخکې دوه ګیلاسه اوبه وڅښئ.
د وینې فشار کمېدل
د اوبو کمښت د وینې فشار هم راکمولی شي، چې بعضې وختونه خطرناک وي.
سرګرځیدل، کانګې کول، سترګې جال جال کیدل دا د فشار کمېدو نښې دي.
ډېره تنده
دا نښه تر ټولو څرګنده ده یعنې تنده.
کله مو له ځان سره دا فکر یا مو حس کړې چې قلباً خوشاله نه یاست یا هم ذهن او زړه مو دومره نارامه دی چې تل په پرېښانیو او خپګان کې یې؟ یا کله چې سهار له خوبه پاڅې دا حس کوئ چې «بیا سهار شو، بیا تکراري د ژوند چارې او ستومانه زه.»
د ملګرو ژوند یا هم په ټولنیزو رسنیو کې د خلکو انځور شوي ژوند حسرت مو خوړلی داسې مو له ځان سره ویلي چې دا خلک څنګه په خپل ژوند کې دومره خوشاله دي یا هم څنګه دوی دومره خوشاله ژوند کولی شي او بیا دې ځان ته کتلي وي چې «زه یې ولې نه شم کولی؟ زه ولې تل خفه یم؟»
ایا له نورو سره مو ځان پرتله کړی چې تر تا ولې دوی ښایسته دي او ته بدرنګه/ بدرنګ یې؟ دوی ولې بریالي دي او ته د دوی په څېر نه یې؟
داسې په سلهاو پوښتنې ممکن تاسو له ځان څخه کړې وي او که د ټولو ځواب «هو» وي نو دا لیکنه ستاسو لپاره ده.
خوښي ترلاسه کیږي او هغه خوښي چې دوام لري، د عادتونو له لارې لاسته راوړل کېږي. ډېروخوشاله خلکو دا زده کړي چې څنګه داسې عادتونه غوره کړي چې هره ورځ یې خوښ وساتي. دا عادتونه دوی ته هدف، ارامښت او په ځانباور وربخښي.
د نویو عادتونو د تل لپاره خپلول سخت دي، خو د هغو عادتونو پرېښودل چې انسان ناهیلی کوي، ډېر اسانه دي. دا بد عادتونه زموږ ذهن له انرژۍ خالي کوي او ژوند تهیې خوند نه پرېږدي. خو که پوه شو چې کوم عادتونه موږ ځوروي، کولی شو له خپل ژوند څخه یې لرې کړو.
ډېر داسې بد عادتونه شته چې خلک ناهیلې کوي. که لاندې بد عادتونه پرېږدې، نو ژر تر ژره به د خوښۍ احساس وکړې. راځه دا بد عادتونه یو له بله سره وپېژنو او پرې یې ږدو:
له منفي خلکو سره ناسته پاسته کول
شکایت کوونکي او منفي خلک ستونزې خوروي، نه حللارې. هغوی غواړي خلک د خپل ناورین برخه کړي چې خپل حال ورسره ښه کړي. که ته شاوخوا داسې خلک لرې چې تل د ستونزو خبره کوي او هېڅ حللار نه لري، نو ورته ووایې چې راځې د حل لپاره یې هڅه وکړ، که یې هڅه ونه کړه او چپ پاتې شو ځان ترې لرې کړئ. ځکه چې منفي انرژي خپروي.
خپله شاوخوا له داسې خلکو څخه ډکه کړئ چې ستاسو لپاره الهام بښوونکي وي، نه دا چې تاسو ته منفي انرژي درکړي.
خپل ژوند د نورو د ټولنیزو رسنیو له ژوند سره پرتله کول
یوه څېړنه ښيي، هغه خلک چې یوه اونۍ له فېسبوک پرته ژوند کوي، تر نورو ډېر د خوښۍ احساس کوي. ټولنیزې رسنۍ اکثره وخت حقیقت نه ښيي، بلکې د خلکو له خوا "فلټر شوی" ژوند ښيي. یو څوک چې د رخصتیو انځورونه خپروي، شاید د زړښت له احساس یا خفګان سره هم لاس او ګرېوان وي. د نورو بېروني بڼه له خپل داخلي واقعیت سره مه پرتله کوه.
ته له بل هېچا کم نه یې، ته چې څنګه یې ډېر ښه یې، په ځان باور ولره.
د حیرانتیا پر وړاندې بې تفاوته اوسېدل
هره ورځ شاوخوا ډېر حېرانوونکي پېښې مو شاوخوا پېښیږي. خو موږ دومره خپل نارمل ژوند کې عادت یوو چې نور مو هېڅ شی نه شي حیرانولی. تاسو به ډېر کله ماشومان لیدلي وي چې د الوتکې غږ ته حیران شوي وي، یا د باران څاڅکو احساسول، پلي تګ کول، کافي څښل، د خوښې شخص سره خبرې کول، د کتابونو لوستل، د فلم لیدل یا هم د نویو ځایونو او پارکونو لیدل دا تر ډېره هغه څه دي چې تاسو کې د حیرانتیا حس زېږوي.
د خوښې لپاره له ځان سره تمرین وکړه، سهار چې له خوبه پاڅیږې ښکلې لمرینې هوا ته وګوره او ووایه: «واه! د لمر وړانګې څومره ښکلې او زړه راښکونکې دي.»
یوازیتوب
ناخوښ خلک اکثراً یوازې وي، خو څېړنې ښيي چې دا تر ټولو بده لاره ده. ټولنیز تعامل، حتا که زړه دې هم نه وي، د مزاج ښه کولو لپاره مهم دی. کله چې چاته یو پیغام استوې، یا پر چا سلام اچوې، دا کوچني کارونه ستا رواني حالت بدلولی شي. له ملګرو سره چکر ته وتل، له کورنۍ سره ګډ خواړه خوړل، یا له ګاونډي سره لنډه احوالاخیستنه ټول ستا مزاج ته خوښي بښي. که یوازې یې، نو له ځان سره ژمنه وکړه چې نن به یوه ملګري ته زنګ وهې، خبرې به کوې یا به هم ورسره ګورې.
پر نوروپړه اچول
که تل پر نورو یا شرایطو پړه اچوې، دا معنا لري چې د خپل ژوند کنټرول په لاس کې نه لرې. کله چې ځان د قرباني په توګه ګڼې، نو خپل ځواک له لاسه ورکوې. خو که ته خپله دا ومنې چې ته غوره یې دا به درته ازادي درکړي او بریا ته دې رسوي د ستونزو پر وخت له ځان څخه دا وپوښتئ: «زه څنګه دا حالت بدلولی شم؟»
نور کنټرولول
یوازې یو کس شته چې ته یې کنټرولولی شې او هغه ته یې! که هڅه کوې نور کنټرول کړې، دا به ستا پر احساساتو بد اغېز وکړي. کنټرول نه، مګر همغږي غوره ده. خلک خپلواک دي او هر څوک خپله لاره لري. د کنټرول پر ځای باور پرې وکړه او د اعتماد فضا رامنځته کړه.
شکایت کول
شکایت کول یوه منفي کړنه ده. که تل د بدو شیانو یادونه کوې، منفي احساسات دې نور هم قوي کېږي. هر وار چې شکایت کوې، ذهن دې هماغې ستونزې ته په بیا-بیا وړي. د شکایت پر ځای پرحل لارې خبرې وکړه. د مثبت فکر تمرین کول، لکه شکر اېستل، کولی شي تاسو ته خوښي درکړي.
د خلکو د تاثیر لاندې راتلل
د ښکلي موټر، لباس یا نوم له امله به خلک درسره ښې اړیکې ونیسي، مګر دا په دې مانا نه ده چې دوی تا خوښوي هڅه وکړئ داسې کسان ومومې چې ته څنګه یې، همغسې دې خوښ کړي. کله چې ته له خپل ځان سره رښتینی وې، اصلي خلک به ستا خوا ته راشي. هغوکسانو پسې مه ګرځه چې غواړي تا بدل کړي، بلکې له هغو سره وخت تېر کړه چې ته څنګه یې، ستا هماغه بڼه خوښوي. تاته په ځان باور درکوي نه بې باوري، فشار او خفګان.
ته باید پوه شې ته چې څنګه یې ډېره/ ډېر ښه، ښکلې/ ښکلی یې.
منفي فکرونه
منفي لیدلوری، یواځې حالت نه خرابوي، بلکې دا هغه وړاندوینه ده چې که د بدو تمه لري بد به درسره کیږي او که د ښه تمه لرې ښه به درسره کیږي. ذهن د باغ په مثال دی، که باغ کې ګلونه وه کړئ، نو ښه ګلونه له وه وینئ. تل باید واقعیت ته وګورئ ډېری وخت حالت دومره بد نه وي.
هره ورځ د یو ښه فکر تمرین وکړه، دا به درسره مرسته وکړي چې ژوند ته مثبت نظر ولرې.
هدف نه لرل
هدف لرل هیله پیدا کوي. که هدف ونه لرې، ژوند یو ډول ناخونده درباندې تېریږي. هدف درته لاره درښيي، جهت درکوي او دلیل درکوي چې ولې سهار له خوبه پاڅې. دا هدف ممکن کوچنی وي، لکه هره ورځ کتاب لوستل، یا ستر وي، لکه یوه پروژه پای ته رسول. خو هر ډول چې وي، هدف درته خوښي او معنا بښي.
وېرې ته نه تسلیمېدل
وېره د تصور محصول دی، نه حقیقت. خوشحاله خلک دا درک کوي چې وېره باید ماته شي. که ته وېره ومنې، وده نه شې کولای. د وېرې مقابله دا احساس درکوي چې ته ژوندی یې، فعال یې او خپلواکه یې. له خطرونو نه وېره مه کوه، له هغه ژوند نه وېره وکړه چې هېڅ احساس پکې نه وي.
له حال څخه تېښته
تېر او راتلونکی، دواړه فکر وکړه مانا نه لري. نه پښېماني تېر بدلولی شي، نه اندېښنه راتلونکی. خو اوس هماغه یوازینی وخت دی چې ته پکې ژوند کولای شې. هر ځل چې ته له حال نه تېښته کوې، له خپل ژوند نه تېښته کوې. د اوسني وخت قدر وکړه، ځکه چې ته په همدې حال کې خوښ او بریالی کیدلی شې.
منم چې د بدو عادتونو پرېښودل او د نویو عادتونو تمرین به لږ سخت وي، مګر ناممکنه نه دي. که له بدو عادتونو سره خدای پاماني وکړئ، د خوښۍ دروازې به ستاسو پر مخ پرانیستل شي.