ډایکنډي کې د طالبانو د طبیعي پېښو پر وړاندې د چمتوالي ریاست ویلي، چې د تاجکستان په یوه کان کې د ګازو د اورلګېدنې له امله اته تنه افغان کارګران وژل شوي دي. دغه ریاست ویلي، چې د پیښي ټول قربانیان د ډایکنډي ولایت اوسیدونکي دي.
طالبانو ویلي، چې په مړه شویو کسانو کې پنځه کسان یې د شهرستان، دوه د میرامور او یو هم اشترلي ولسوالۍ اوسیدونکی دی.
د طالبانو د بهرنیو چارو وزارت د شنبې په ورځ د یوې اعلامیې په خپرولو سره ویلي، چې د دغه ډلې د بهرنیو چارو وزیر امیرخان متقي، په کابل کې د چین ځانګړي استازي شیایونګ او د افغانستان لپاره د پاکستان ځانګړي استازي محمد صادق سره په ننۍ ناسته کې د افغانستان ـ چین ـ پاکستان د بهرنیو چارو وزیرانو د ډیالوګ د پنځمې ناستې د موضوعاتو د تعقیب او د راتلونکي شپږمې ناستې او د افغانستان د ګاونډیو هېوادونو د بهرنیو چارو وزیرانو د راتلونکې پنځمې غونډې، سیاسي او اقتصادي همکاریو په اړه خبري وکړي.
اعلامیه زیاتوي، چې د طالبانو د بهرنیو چارو وزیر، د پاکستان او چین ځانګړو استازو هوکړه کړې، چې د درې واړو هېوادونو د بهرنو چارو وزیرانو راتلونکې ناسته به د کابل په کوربهتوب ترسره شي، خو د یادې ناستې د ترسره کېدو په اړه دقیقه نېټه نه ده په ډاګه کړې.
متقي له چین او پاکستان سره د افغانستان سیاسي او اقتصادي اړیکې مهمې بللي او د نورو پرمختګونو هیله یې ښودلې ده.