پاکستان خپله دفاعي بودجه ۲۰ سلنه زیاتوي

اټکل کیږي چې د بودجې تمرکز به پر دفاعي لګښتونو وي، چې دا زیاتوالی به د پراختیایي پروژو د بودجې په کمولو سره جبران شي.

په روان مالي کال کې پاکستان د دفاع لپاره ۲.۱ ټریلیون روپۍ ځانګړې کړې وې، په داسې حال کې چې د تقاعد شویو پوځیانو لپاره اضافي ۵۶۳ میلیارده روپۍ بېلې شوې وې. تمه ده چې دا شمېرې د راتلونکي کال لپاره نږدې ۲۰سلنه لوړې شي.

په همدې حال کې، د هند حکومت هم خپل دفاعي لګښتونه ۷۸.۷ میلیارد ډالرو ته لوړ کړي، چې دا د تېرو کلونو پرتله نږدې ۹.۵ سلنه زیاتوالی ښيي.

د شهباز شریف حکومت د راتلونکي کال لپاره ۴.۲ سلنه اقتصادي وده هدف ګرځولی.

د نړیوال وجهي صندوق (ای‌ام‌ایف) سره د ۷ میلیارده ډالرو د مالي مرستې د تړون دوام لپاره، پاکستان اړ دی چې خپل مالیاتي بنسټ پراخ کړي.

په ۲۰۲۴ کې یوازې ۱.۳ سلنه نفوس عایداتي مالیه ورکړې ده.

د پاکستان د مالیې وزیر محمد اورنګزیب ویلي، «دا ځل موږ ډېر روښانه یو چې دا اقتصادي فرصت باید له لاسه ورنه کړو. موږ هڅه کوو د ثبات دې مسیر ته دوام ورکړو.»

د پاکستان نوی مالي پلان داسې ښکاري چې د امنیت، نړیوالو ژمنو او داخلي اقتصادي ستونزو ترمنځ یو نازک توازن وساتي.