ایران: د امریکا ولسمشر بې نزاکته دی
د امریکا د ولسمشر ډونالډ ټرمپ له خوا د جمعې په ورځ په یوه خبري ناسته کې د ایران د مشر علي خامنهيي له ملنډو وروسته، د ایران د بهرنیو چارو وزارت په خپل رسمي دریځ کې د ټرمپ دا څرګندونې غندلي او هغه یې د نزاکت خلاف بللي دي.
د ایران د بهرنیو چارو وزارت په یوې اعلامیې کې ویلي: "د ایران د اسلامي جمهوریت بهرنیو چارو وزارت د ایران د معظمې رهبرۍ په تړاو د امریکا د ولسمشر دغه سخیف او د نزاکت خلاف څرګندونې په کلکه غندي. "
د اعلامیې له مخې، د امریکا د ولسمشر دغه ډول څرګندونې نه یوازې د ډيپلوماټيکو اصولو او اخلاقو خلاف چلند دي؛ بلکې د نړۍوالو د ګډو ارزښتونو او اصولو او همداراز د ملګرو ملتونو د منشور پر بنسټ د ملتونو د برخلیک د ټاکلو حق د درناوي فاحش نقض دی.
په اعلامیه کې همداراز زیاته شوې، چې د امریکا ولسمشر په دغه ډول څرګندونو سره د ایران ملت ته سپکاوی کړی او په سیمه کې یې د میلیونونه مسلمانانو احساساتو ته په نه سترګه کتلي دي.
اعلامیه کاږي، د ایران پر ضد او د ایرانیانو او مسلمانانو د احترام وړ سیاسي او مذهبي مشرانو ته دغه ډول د سپکو او سپورو ویل به د امریکا له پالیسو د خلکو د کرکې د ډېرېدو او همداراز به خبرو اترو او تعامل ته د لېوالتیا د ادعاوو د بې اعتباره کېدو لامل شي
په دې اعلامیه کې د ایران د بهرنیو چارو وزارت ویلي: "د ایران د اسلامي جمهوریت د بهرنیو چارو وزارت د امریکا دولتي چارواکو ته توصیه کوي، چې د توهینوونکو لفاظیو او په دریځونو کې د مکررو نوساناتو پر ځای، امریکا باید د قانون ماتونې او د ایران پر سوله ییزو اټومي تاسیساتو د برید په تړاو د نړۍالو حقوقو فاحش نقض او له صهیونیستي رژيمه د ملاتړ په برخو کې ځواب ویونکی واوسي. "
تر دې مخکې د ایران د بهرنیو چارو وزیر عباس عراقچي هم د امریکا ولسمشر یادو څرګندونو ته په غبرګون کې ویلي و، که ټرمپ رېښتینې هوکړه غواړي، نو باید د ایران د مذهبي مشر ایتالله علي خامنهيي پر وړاندې "د سپکاوي ډکې ژبې او د خپلو مېلیونونو ملاتړکوونکو له ځورونې نه لاس واخلي. "
دا په داسې حال کې ده، چې د امريکا ولسمشر ډونالډ ټرمپ د جمعې په ورځ په يوې خبري ناسته کې د ايران د دولت پر مذهبي مشرعلي خامنه یي په یوه ډول ملنډې ووهلې او ویې ویل: "خامنه یي يو با ايمانه کس دی، خلک په ايران کې هغه ته درناوی لري؛ خو په اوس وخت کې باید هغه رښتيا ووايي او خپله ماتې ومني. "
نوموړي همداراز په ډاګه کړې وه، چې د ايران مشرتابه بايد د حقيقت منلو ته چمتو شي او دا ومني چې خلک نور د توندلاري سياست ملاتړي نه دي.