عاطف مشعل: د روسیې پرېکړه د افغانستان او سیمې لپاره ستر ډېپلوماټیک ګام دی
د افغانستان په چارو کې د روسیې د رسمي دریځ له اعلان وروسته، په پاکستان کې د افغانستان پخواني سفیر عاطف مشعل دغه پرېکړه د دواړو لوریو ترمنځ یو مهم ډېپلوماټیک پرمختګ بللی دی.
د افغانستان په چارو کې د روسیې د رسمي دریځ له اعلان وروسته، په پاکستان کې د افغانستان پخواني سفیر عاطف مشعل دغه پرېکړه د دواړو لوریو ترمنځ یو مهم ډېپلوماټیک پرمختګ بللی دی.
مشعل په ایکس لیکلي، چې د روسیې فدراسیون لهخوا د طالبانو نظام په رسمیت پېژندنه نه یوازې یو منطقي او سنجیده اقدام دی، بلکې دا تصمیم د سیمې او نړۍ د روان وضعیت له دقیق درک سره هممهاله شوی دی.
نوموړي ټینګار کړی چې دغه پرېکړه د سیمهییز ثبات، امنیت، او پرمختګ لپاره حیاتي اهمیت لري. د هغه په وینا، "دا تصمیم نه یوازې د سیمې د ثبات او امنیت لپاره خورا مهم وو، بلکې د سیمهییز پرمختګ لپاره هم ډېر اړین وو."
مشعل باور څرګند کړی چې د روسیې دا ګام به د نورو هېوادونو لپاره هم یوه لاره خلاصه کړي. ده زیاته کړې: "داسې ښکاري چې د روسیې په دې قدم به د سیمې ډېر هېوادونه پل کېږدي او د رسمیت پېژندنې دا لړۍ به د سیمې او نړۍ په کچه دوام ومومي."
نوموړي لوېدیځو هېوادونو ته هم مشوره ورکړې چې له افغانستان سره د تعامل فرصت له لاسه ورنکړي، ځکه چې د ده په باور، تعامل د شخړو د هوارولو او د اعتماد د بېرته راژوندي کولو اساسي لاره ده.
د یادونې ده چې روسیې د طالبانو حکومت د رسمیت پېژندنې اعلان تازه کړی، خو تر دې دمه نورو مهمو هېوادونو، په ځانګړي ډول لوېدیځو هېوادونو د ورته اقدام په اړه رسمي دریځ نه دی ښکاره کړی.
