د پاکستان د کورنیو چارو وزارت د دولت وزیر طلال چودري ویلي، پاکستان افغان وګړو سره د ورورولۍ له مخې چلند کوي. دا په داسې حال کې ده چې وروستیو میاشتو کې په دغه هېواد کې زرګونه افغان کډوال نیول شوي او جبري افغانستان ته شړل شوي دي.
دغه خبرې طلال چودري د پنجشنبې په ورځ (چنګاښ ۱۲مه) د افغانستان لپاره د ملګرو ملتونو د مرستندوی ماموریت (UNAMA) له مشرتابه غړې میرمن دنیس ویلمان سره په اسلاماباد کې د لیدنې پر مهال کړي.
ددغه چارواکي په وینا، هېواد یې له افغان وګړو سره تل د ورورولۍ، درناوي او ښه نیت پر بنسټ چلند کړی دی. هغه زیاته کړې: "موږ باور لرو چې د ګډ احترام، باور او تعامل له لارې کولی شو د سیمې لپاره یو باثباته راتلونکی تضمین کړو."
چودري وویل چې د "یو سند نظام" (One Document Regime) له لارې پاکستان هڅه کوي بهرنیانو ته د تګ راتګ او قانوني اسنادو پر بنسټ اسانتیاوې برابرې کړي.
دا څرګندونې په داسې حال کې کېږي چې، د بشري حقونو سازمانونه، رسنۍ او د کډوالو ملاتړي بنسټونه د پاکستان په حکومت نیوکه کوي چې په وروستیو میاشتو کې یې له یو میلیون څخه ډېر افغان کډوال، چې ډېرییې ښځې او ماشومان دي، نیولي، بندیان کړي او د عدالت له شفاف بهیره پرته افغانستان ته شړلي دي.
د بخښنې نړیوال سازمان او نورې ادارې دا اقدامات "غیرقانوني جبري شړنه" بللې او ویلي یې دي چې دا کړنې د نړیوالو بشري اصولو خلاف دي.
میرمن دنیس ویلمان هم د لیدنې پر مهال د کډوالو موضوع یادونه وکړه او ویې ویل، چې ملګري ملتونه له ټولو ښکېلو اړخونو غواړي چې د کډوالو حقونو ته درناوی وشي او هغوی سره له بشري اړخه چلند وشي.
