د نوې - زړې د لیکوالو ډله
مقتدي: (په مسجد کې) ملا صاحب یوه پوښتنه مې کوله ملا صاحب: (د ملنډو په ډول مسکی کېږي) مکتبیه وایه بیا دي په زړه کې څه پساتي پوښتنه درګرځېدلې ده، تاسې مکتبیان خو له پساته پرته بل کار نه لرئ.
مقتدي: ما ویل چې روسانو د طالبانو حکومت په رسمیت وپېژاند، دا مسلمان هېوادونه او په خاص ډول ګاونډي هېوادونه یې ولې په رسمیت نه پېژني؟
ملا صاحب: روسان اوس هغه پخواني دهریان نه دي، اوس یهود او نصارا دي.
مقتدي: نو یهود او نصارا کافران نه دي؟
ملا صاحب: کافران دي، خو اهل کتابه دي، د دوی له ښځو سره زموږ نکاح روا ده، د دوی د لاس ذبحه روا ده او بل نو په اخيره زمانه کې ایمان راوړي.
مقتدي: نو اهل کتابه کافران چې دومره ښه خلک دي تاسې ولې دا شل کاله جګړه ورسره کوله؟
ملا صاحب: (په قهر) ما خو درته وویل چې ته مکتبی یې، زړه مې غواړي چې دا تفدانۍ دې پر دا سر درچپه کم، ته و خدای دا اوس پوښتنه ده؟
مقتدي: (په وارخطايي) خیر دی بله پوښتنه به وکم، ما ویل چې دا مسلمان هېوادونه ولې دا حکومت په رسمیت نه پېژني؟
ملا صاحب: نو پوتین صاحب خو کافر دی او له کافر سره شیطان نه وي، له چا سره چې شیطان نه وي هغه به خود دغسې نېک کارونه کوي، مسلمانان بېچاره ګان خو شیطان پر ارامه نه پرېږدي.
مقتدي: نو نور ملایان خو وايي چې کافران هیڅکله د مسلمان دوست نه شي کېدای، تاسې ولې د پوتین رسمیت ته خوشحاله یاست؟
ملا صاحب: علما وايي چې په اخیره زمانه کې پاک خدای خپل دین په کافرانو ساتي.
مقتدي: دا خبره په کوم کتاب کې راغلې ده؟
ملا صاحب: (په قهر) شین امي ته په عربي پوهېږې که په دین خبر یې؟ که زه همدا اوس کتاب درښکاره کم ته یې ویلای شې؟
مقتدي: (په ډار) خیر دی بله پوښتنه به وکم، ملایان صاحبان خو وايي چې د نجونو زده کړه په دین کې نه شته، مکتب په دین کې نه شته، پلانی شی په دین کې نه شته، دا نه شته او ها نه شته... ایا د کفارو له خوا په رسمیت پېژندل په دین کې شته؟
ملا صاحب: نو دین خو ملایان بیانوي، ديني کتابونه هم ملایانو لیکلي دي، ضرور نه ده چې هره خبره دې په کتاب کې راغلې وي، ملایانو چې هر څه وویل هغه د دین خبره ده، مثلا د اشغال پر مهال د تاریاکو کښت روا و، خو اوس حرام شو، په کتاب کې د رسمیت پېژندنې موضوع شاملول هم سخت کار نه دی، زه همدا اوس د یوې فتاوا په لیکلو لګیا یم، دا فتوا به هم په کې ولیکم چې د کفارو له خوا د مسلمانانو حکومت په رسمیت پېژندل (قبیح بذاته و احسن لغیره) دی.
مقتدي: (په حیرانۍ) قبیح بذاته او احسن لغیره څه مانا؟
ملا صاحب: مانا دا چې دا کار د پوتین له پاره قبیح او بد عمل دی، یاني پوتین سور کافر دی پاک خدای یې د دې کار ثواب نه ورکوي، خو احسن لغیره دا مانا چې دا کار زموږ په ګټه او احسن کار دی.
مقتدي: که امریکایانو مو په رسمیت وپېژني هغه به هم احسن کار وي؟
ملا صاحب: نو امریکایانو خو هم تر اشغال وروسته ځینې ښه کارونه هم وکړل، مثلا په دوحه کې یې موږ ته واک راتسلیم کړ او هره هفته به یې څو میلیونه ډالر راکول.
مقتدي: نو امریکایان پخوا بدل خلک وو؟
ملا صاحب: خود بد خلک وو، زه د جمهوریت په وخت کې د دوی دښمن نه وم، نه طالب وم او نه مجاهد، خپله ملايي مې کوله، دې لاس ته مې وګوره ټپ یې تر اوسه پورې پاتې دی. یوه ورځ له جومات څخه ووتلم چې ګورم چې د جومات مخ ته یو سور امریکايي ولاړدی، ده چې ویل زه مجاهد یم، توپک یې راته سم کړ او ویې ویشتلم.
مقتدی: (په داسې حال کې چې ځان منډې ته برابروي) نو ولې وروتلې؟
ملا صاحب: (په قهر او لوړ اواز) رزیله ته په ملایانو ریشخند وهې؟ وا طالبانو! هلئ راشئ دا زندیق ونيسئ او سنګسار یې کړئ! هلئ دا مکتبي کافر شوی دی...
(مقتدي تښتي)
ملا صاحب: (په لوړ اواز) ودرېږه چېرې ولاړې؟ په لاس به رانه شې!
