د مصنوعي ځيرکتیا په مرسته جوړ شوي شیخان نندارې ته وړاندې شول
د حاجي تورجان په نوم د افغانستان یوه پانګهوال د لومړي ځل لپاره د مصنوعي ځیرکتیا په مرسته د شیخ القران او شیخ الحدیث جوړولو ماشین جوړ کړ.
د حاجي تورجان په نوم د افغانستان یوه پانګهوال د لومړي ځل لپاره د مصنوعي ځیرکتیا په مرسته د شیخ القران او شیخ الحدیث جوړولو ماشین جوړ کړ.
حاجي تورجان پر خپله اېکس پاڼه لیکلي، چې د دغه مصنوعي شیخانو کیفیت ډېر ښه دی او ډېر ژر به د اصلي شیخانو ځای ونیسي.
په اعلامیه کې راغلي، د مصنوعي ځیرکتیا په مرسته څو زره شیخ الحدیث او شیخ القران روباټونه جوړ شوي چې ډېر ژر به نندارې ته وړاندې شي. دغه فابریکه دا ظرفیت لري، چې په یوه ورځ کې څو زره مصنوعي شیخان جوړ کړي.
حاجي تور جان وايي، چې دغه شیخان ځیرک نهدي او نه عقل لري؛ یوازې د نقل له مخې قضاوت کوي او هغه هم هغه نقل چې ده حافظې ته وراېنسټال کړی دی.
د دغه مصنوعي شیخانو ځانګړتیا دا ده، چې څوک دین ته نه رابولي؛ بلکې له دین څخه یې باسي او یوازې یې د (کافر شوي) فتوا زده ده.
دغه پانګهوال وايي، چې د دغې فابریکې ماشین الات، برېښنا، کارګر او هیڅ ډول لګښت ته اړتیا نه لري؛ ټول لګښت یې د ملت پر غاړه دی، لکه د شتمنو خلکو زکاتونه، خیراتونه، د سودخورو او قاچاق کوونکو بسپنې، سرسایې او پټو بلاوو چندې.
تورجان وايي، چې افغانستان پخوا له پاکستانه ماشيني طالبان، ملایان، مفتیان، قاریان او حافظان راواردول؛ خو اوس خپله په افغانستان کې جوړېږي.
هغه زیاتوي، چې په وروستیو کې د دغه ماشیني کدرونو عرضه ډېره شوې؛ خو تقاضا یې کمه شوې وه، نو له همدې امله هغه لاهور ته ولاړ له هغه ځایه یې د مصنوعي شیخ القران او شیخ الحدیث جوړولو ماشین الات راوړل.
تورجان وایي، که د ماشیني شیخ القران او شیخ الحدیث عرضه ډېره او بازار کې تقاضا کمه شي؛ نو هغه به خپلو ماشین الاتو او تولید ته بدلون ورکړي. دوی همدا اوس لا چمتووالی لري، چې په راتلونکې وخت کې ماشیني امامان تولید کړي، چې د پخوانیو اصلي امامانو ځای ونيسي.
ملایان شکایت کوي، چې پخوا به د چا څاه ته یو موږک ورولوېد؛ نو دوی به د خپل جومات له ملا څخه پوښتنه کوله، چې څو سلواغې اوبه راوکاږي چې څاه یې پاکه شي؛ خو اوس له چټ جيپيټي پوښتنه کوي، ان دا چې چټ جيپيټي خلکو ته د لویو دیني علماوو په اندازه معلومات ورکوي؛ نو له همدې امله د دوی بازار سوړ شوی دی.
طالبانو او ملایانو اندېښنه ښودلې، چې اوس هم ډېر طالبان او طالب پلوه جنګیالي له دندو ګوښه شوي دي؛ که د ماشیني شیخانو تولید ډېر شي، دغه شیخان به د دوی ځای ونیسي او د تنقیص بهیر به نور هم ګړندی شي.
له بلې خوا بیا واقعي دیني علما اندېښنه ښيي، چې د مصنوعي ځيرکتیا په مرسته جوړ شوي شیخان به د اصلي شیخانو ځای ونیسي او کېدای شي چې دغه شیخان د چا لهخوا هېک او د دین پر ضد وکارول شي.
د دغې فابریکې په جوړولو ولسي خلکو هم اندېښنه ښودلې ده، خلک وايي چې اوس هم هغوی ته په وړه خبره د کافرانو او سېکولرانو خطاب کېږي؛ که دغه ماشیني شیخان ډېر شي، نو یو وخت به خدای مه کړه له شیخانو پرته ټول ملت کافر وبلل شي.
د یادونې وړ ده، چې تورجان پخوا هم د مصنوعي علمي کدرونو په برخه کې پانګونه کړې وه؛ د کمونستانو په دوره کې یې ماشیني ضابطان او ډګروالان او تېر جمهوریت کې یې جنرالان تولیدول؛ خو هغه وخت یې تولید ډيجيټل نه، بلکې انالاګ و.
