په کونړ کې ځايي سرچینو افغانستان انټرنشنل پښتو ته ویلي، چې دغه زلزله ځپلې مېندواره مېرمنې د کونړ په روغتونونو کې د روغتیایي اسانتیاوو او ښځینه روغتیاپالو د کمښت له کبله مړې شوې دي.
د سرچینو په خبره؛ له پراخو ژمنو سره، سره لاهم سیمې ته لومړنۍ او په ځانګړې توګه روغتیایي مرستې نه دي رسېدلې او خلک له ګڼو ستونزو سره لاس او ګرېوان دي.
سرچینو همدا راز ویلي، چې د څوکۍ ولسوالۍ په ځپل شویو کلیو او بانډو کې خلک د څښاک لپاره د پاکو اوبو له سخت کمښت سره مخ دي چې باید له ځنډ پرته ورته رسېدنه وشي.
سرچینې وايي، که څه هم د ژغورنې ځینې ډلې په سیمه کې په عملیاتو بوختې دي؛ خو پراخې ویجاړۍ او د دغو ډلو کمښت ته په پام لاهم ډېری مړي او ټپیان تر خاورو لاندې دي.
