د طالبانو مرستیال ویاند حمدالله فطرت ویلي، چې په کونړ کې د نړېدلو کورونو د پلټنې پر مهال د مړو راېستلو سره د قربانیانو شمېره تر ۱۴سوو هم لوړه شوې؛ خو لا هم کره شمېره نهده معلومه. طالبانو تر دې مخکې خبر ورکړی و، چې په دغه زلزله کې ۱۴۵۷ کسان مړه شوي دي.
د فطرت په وینا؛ د ځینو نامسووله کسانو له لوري د زلزلې شمېر ډېر لوړ ښوول شوی چې دوی یې نه شي تاییدولی. هممهاله په کونړ کې شکایتونه کېږي، چې نړۍوالو مرستندویه ادارو او طالبانو تر اوسه پورې ټولو زیانمنو کورنیو ته رسېدنه نهده کړې او خلک له جدي ستونزو سره مخ دي.
د زلزلې زیانمن د خوراک، څښاک او سرپناوو له نشتوالي سره مخ دي؛ خو د کونړ په مزار دره او دیوه ګل دره کې یوازې محدودو کلیو ته مرستندوی پلاوي ورغلي دي. د کونړ ځايي فعالان هم نیوکې کوي، چې د زلزلې په څلورمه ورځ لا هم داسې کلي شته چې هېڅ مرستندوی سازمان او د طالبانو ژغورونکې ډلې نه دي ور رسېدلې او دغو لوړو درو ته په ورتګ سره ښايي د قربانیانو شمېر لا ډېر شي.
