د ملګرو ملتونو د نفوسو صندوق راپور ورکړی چې د افغانستان د وروستۍ زلزلې د قربانیانو په لړ کې شاوخو ۱۱ زره او ۶۰۰ امېندوارې مېندې بېړنیو مرسته ته اړتیا لري. دغه اداره وايي چې سیمې ته یې څلور روغتیايي ډلې لېږلي، خو ځينو سیمو ته امبولانسونه نه شي تلای.
د ملګرو ملتونو د نفوسو صندق (UNFPA) اجراییوي مشرې دیان کیتا وویل: «زموږ لومړیتوب دا دی چې د امېندوارو مېندو ت څنګ ودرېږو او د هغوی د چټکې بیارغونې ملاتړ وکړو.»
د دې ادارې په وینا، که څه هم لېرې پرتو سیمو ته د تلو په لاره کې ډېر خنډونه شته، په تېره بیا هغه سیمې چې لارې یې د زلزلې له امله ویجاړې شوي او یا له لویه سره موټر نه شي ورتلای.
د ملګرو ملتونو د نفوسو صندق وايي چې ننګرهار، کونړ، لغمان او نورستان ولایتونو ته یې څلور ګرځنده روغتیایي ډلې له بېړنیو درملو او امبولانسونو سره استولي څو هلته د مور او ماشوم لپاره روغتیايي اسانتیاوي برابرې کړي.
د یادې ادارې استازي کوابینا اسانتنټیاموا وویل: «د امېندوارو ښځو طبیعي ناورین کولای شي چې د هغوی ژوند له جدي خطر سره مخ کړي.»
د دې ادارې په وینا، افغانستان په اسیا کې له هغو هېوادونو څخه دی چې د مور او ماشوم د مړینې کچه په کې لوړه ده.
