اپل شرکت نن سې شنبه د یوه نندارتون په ترڅ کې چې (Awe Dropping) نومیږي د ایفون ۱۷ لړۍ پرانیسته کوي. تمه ده چې په دې لړۍ کې څلور نوي ماډلونه ایفون ۱۷، ایفون ۱۷ اېر، ایفون ۱۷ پرو او ایفون ۱۷ پرومکس نندارې ته وړاندې شي.
اپل به همداراز د راتلونکي نسل اپل واچ او نوي ایرپډونه هم وړاندې کړي. د شرکت په وینا، په دغه نندارتون کې د مصنوعي ځیرکتیا (اې ای) اړوند پرمختګونو ته هم اشاره کېږي.
د ایفون ۱۷ لړۍ په موبایلونو کې ځیني نوي تغییرات راغلي دي لکه د دغه موډل سکرین ۶، ۳ انچه دی، ریفریش ریټ یې په یوه ثانیه کې ۱۲۰ Hz دی. د ایفون ۱۷ پرو د کامرې بڼه د تېرو ماډلونو په پرتله بدله شوې او افقي شکل لري او همدا راز تر مخکیني ایفون یې وزن هم کم دی. د ایفون ۱۷ حافظه له ۲۵۶ څخه پیل کیږي.
د شرکت تر ټولو لوړ ماډل، ایفون ۱۷ پرو مکس، ښايي د لوړ ظرفیت بیټرۍ ولري. بل خوا ایفون ۱۷ اېر به د پلس ماډل ځای ونیسي او د اپل تر ټولو نری او نازک تلیفون بلل شوی دی.
دغه نندارتون به د کالیفورنیا په کوپرټینو کې د اپل په مرکزي دفتر کې ترسره شي او د نړۍ په بېلابېلو هېوادونو کې به په ژوندۍ بڼه خپور شي.
