د طالبانو تر واک لاندې سترې محکمې ویلي چې د کابل د نشهیي توکو او مسکراتو د مخنیوي ابتدایه محکمې لس کسان د نشهیي توکو د خرڅلاو او قاچاق په تور په دُرو وهلي دي. دغې محکمې دوی د ذیکپ او ټابلیټ کا نشهیي ټابلیټونو، الکولي مشروباتو او چرسو د خرڅلاو او قاچاق په تور مجرم ګڼلي وو.
یاد کسان له لسو مياشتو څخه تر دوو کالو او شپږو مياشتو تنفيذي بند باندې محکوم شوي او له ۱۰څخه تر ۳۹دُرې وهل شوي دي.
د طالبانو کورنیو چارو وزارت ویلي چې، په هرات ولایت کې یې هغه ډله نیولې چې خلکو ته یې بې سده کوونکي توکي ورکول او وروسته به یې د هغوی شتمنۍ لوټلې. یاد وزارت وايي، له دغو غلو څخه تر اوسه ۲۰ تنو لوټل شویو کسانو شکایتونه کړي دي.
د طالبانو د کورنیو چارو وزارت په خبرپاڼه کې ویل شوي، چې د عملیاتو پر مهال له دې ډلې یو موټرسایکل، یوه اندازه نشهيي توکي او نغدې پیسې هم ترلاسه شوي دي.
خبرپاڼه زیاتوي، له دغو غلو څخه تر اوسه ۲۰ تنو زیانمنو شویو کسانو شکایتونه کړي دي.
د طالبانو د کورنیو چارو وزارت په وینا، دریو زیانمنو له دوی مننه کړې او له خلکو یې غوښتي چې له ناپېژندو کسانو د خوراکي او څښاک توکو د اخیستو پر مهال ډېر پام وکړي.
له ۲۰۲۱ کال راهیسې چې طالبان پر افغانستان واکمن شوي، په هېواد کې اقتصادي بحران او بیکاري، بېسارې زیاته شوې ده.
د عوایدو د کمېدو، پانګونې د رکود او د مرستو د بندېدو له امله ګڼې کورنۍ له اقتصادي ستونزو سره مخ دي.
شنونکي وايي، د کار د نشتوالي او اقتصادي فشارونو له کبله په ښارونو کې د غلاوو کچه لوړه شوې ده.
په کابل کې د طالبانو د ریاستالوزرا اقتصادي مرستیال ملا عبدالغني برادر د ایران د صنعت، کانونو او سوداګرۍ له وزیر سید محمد اتابک او ورسره مل اقتصادي پلاوي سره کتلي او د اقتصادي همکاریو پر پراخولو یې ټينګار کړی.
د طالبانو د ریاستالوزرا د اقتصادي مرستیال دفتر ویلي چې په دې کتنه کې دواړو لوریو د سوداګرۍ، ترانزیټ، پانګونې، د چابهار بندر او ګډې اقتصادي کمېټې د فعالیتونو پر لا اغېزناکتیا هر اړخیز بحثونه کړي دي.
په کابل کې د ایران سفارت هم وویل، چې د دې لیدنې پر مهال د صنعت، معدن او تجارت په برخو کې د همکارۍ پر پراختیا ټینګار شوی دی.
د ایران سفارت د معلوماتو له مخې، سید محمد اتابک د دولتي او خصوصي برخې له اقتصادي پلاوي سره کابل ته راغلی او ټاکل شوې ده چې د طالبانو حکومت او خصوصي سکتور له مسوولانو سره هم وګوري.
یاده دې وي چې ایران د طالبانو له واک ته رسېدو وروسته د دې ډلې له مهمو اقتصادي شریکانو بلل کېږي.
که څه هم ایران د طالبانو حکومت په رسمیت نه دی پېژندلی خو بیا هم تهران له کابل سره د سوداګرۍ او ترانزیټي دهلیزونو د پراخولو ترڅنګ، د چابهار بندر له لارې د افغانستان د صادراتو او وارداتو لپاره ځانګړې لارې پرانېستې دي.
سربېره پر دې، دواړو لوریو د تېلو، برېښنا او کانونو په برخو کې هم پر ګډو همکاریو ټینګار کړی دی.
د طالبانو د لوی درستیز د مرستیال زوی وايي، چې ګڼ نظامونه راغلي او تللي، خو د ظلم په نوم یو هم داسې نه دی پاتې شوی چې بریالی شوی وي. نوموړی وايي، «ظلم د انسانیت د وینو په څښلو دوام کوي او د وینو سیندونه د تل لپاره نه بهیږي».
د طالبانو د مرستیال لوی درستیز مالي خان صدیق زوی برهان اتل پر خپله فیسبوک پاڼه د طالبانو وروستیو بندیزونو او د منتقدانو نیولو ته په غبرګون کې ویلي، چې په افغانستان کې ګڼ نظامونه راغلي او بېرته تللي، خو ظالم حکومتونه نه دي پاتې شوي.
نوموړی وايي، « د تاریخ په پاڼو کې هر څه تکرار شوي، د کفر نظامونه راغلي او تللي دي، خو د ظلم په نوم یو هم داسې نه دی پاتې شوی چې کامیاب شوی وي».
نوموړي دغه راز په یوه بل پوسټ کې لیکلي، چې طاهر اشرفي، مفتي عبدالرحیم، طارق مسعود او د پاکستان لسګونه نور ملایان لګیا دي او د افغانستان خلاف فتوې ور کوي خو طالبان ستانکزی په سپینه ږیره جلا وطن کوي او د شکر ناروغ مبین غږ د زندان د پنجرو تر شا ورکوي او ۸۰ کلن ډاکټر فاروق اعظم زندانيکوي.
د طالبانو مشر تازه په بلخ ولایت کې پر انټرنېت بندیز لګولی او دلیل یې د« منکراتو» مخنیوی بللی دی.
دې ډلې خپل د اوبو او برېښنا وزارت سلاکار له دې امله زندان ته اچولی، چې د ښځو د زده کړو او عصري علومو ملاتړ یې کاوه.
سرچینو افغانستان انټرنشنل ته وویل، چې طالبانو د نوموړي قضیه خپلې نظامي محکمې ته راجع کړې ده.
د طالبانو په ځوان نسل کې یو شمېر کسان وخت ناوخته ددې ډلې د مشرانو د بندیزونو او سخت دریځیو مخالفت کوي.
له دې وړاندې د حقاني شبکې اړوند کسانو هم ددې ډلې د حکومت پر څرنګتیا او د مولوي هبت الله پر فرمانونو او حکمونو نیوکې کړې وې.
د عربي او اسلامي هېوادونو د مشرانو په وروستۍ بیړنۍ غونډه کې، چې د قطر په پلازمېنه دوحه کې وشوه، د هېوادونو د بېرغونو په کتار کې د افغانستان ملي بېرغ درول شوی و او د طالبانو استازي پکې ګډون نه درلود. قطر ته د امیرخان متقي پرځای د طالبانو دفاع وزیر تللی.
قطر د طالبانو نږدې متحد ګڼل کیږي او د دغې ډلې د سیاسي دفتر کوربه هېواد دی، خو په دوحه کې د اسلامي او عربي هېوادونو په بیړنۍ غونډه کې ددې ډلې استازی نه و او ددې ډلې د بیرغ پرځای، د هېوادونو د بیرغونو په کتار کې د افغانستان ملي بیرغ درول شوی و.
د طالبانو دفاع وزیر مولوي محمد یعقوب د قطر د بهرنیو چارو له وزیر سره کتلي دي، خو د اسلامي هېوادونو د غونډې په څنډه او خپاره شوي انځور کې د طلبانو د هیڅ استازي انځور نه لیدل کیږي.
د طالبانو د بهرنیو چارو وزیر د ملګرو ملتونو د بندیزونو له امله دې غونډې ته نه دی بلل شوی.
دغه غونډه د اسراییل وروستي برید د غندنې او له قطر سره د یووالي د څرګندولو لپاره جوړه شوې وه.
د غونډې د ګډونوالوګډې اعلامیې د فلسطین د خلکو پر ملاتړ ټینګار کړی، د اسراییل بریدونه یې غندلي او پر نړیوالو یې غږ کړی، چې د بشري حقونو د نقض د مخنیوي لپاره عملي ګامونه پورته کړي.
د طالبانو دفاع وزیر محمد یعقوب مجاهد قطر ته د خپل رسمي سفر په ترڅ کې د یاد هېواد د بهرنیو چارو وزیر دکتور محمد بن عبدالعزیز الخلیفي سره لیدلي دي. په دې لیدنه کې د دواړو هېوادونو د اړیکو او همکارۍ په اړه خبرې شوې دي.
د طالبانو ویاند ذبیح الله مجاهد وايي، نوموړی له قطر سره د غم شریکي لپاره دوحې ته تللی.
ویاند زیاتوي چې « یعقوب، قطر هېواد ته د ملاتړ او همدردۍ ډاډ ورکړی دی».
امیرخان متقي د ملګرو ملتونو د امنیت شورا د بندیزونو په لېست کې شامل دی چې د سفر بندیزونه هم پکې شامل دي. خو ملا یعقوب مجاهد د ملګرو ملتونو د بندیزونو په لېست کې شامل نه دی.
هغه طالب چارواکي چې د بندیزونو په تور لېست کې شامل دي، د سفر لپاره د ملګرو ملتونو د بندیزونو د کمیټې اجازې ته اړتیا لري.
د طالبانو د بهرنیو چارو وزیر په دې وروستیو کې ونه توانېد چې هند او پاکستان ته سفر وکړي،ځکه چې د سفر اجازه ورته ورنه کړل شوه.