طالبان وایي، په بغلان کې یې د بېړنيو حالاتو لپاره ۱۶زره مټریک ټنه غنم زېرمه کړي دي

په بغلان ولایت کې د طالبانو د کرنې، اوبو لګولو او مالدارۍ ریاست مسوولینو ویلي، چې په بغلان، کندوز او تخار ولایتونو کې یې ۱۶زره مټریک ټنه غنم راټول او د بېړنیو حالاتو لپاره زېرمه کړي دي.

د طالبانو تر واک لاندې باختر اژانس د بغلان ولایت لپاره د طالبانو د کرنې، اوبو لګولو او مالدارۍ رییس عبدالکریم حذیفه له حوالې لیکلي، دغه راټول شوي غنم به د بېړنیو حالاتو پر مهال د خوراکي توکو د کمښت په صورت کې په اړمنو خلکو ووېشل شي.