د هالیووډ نامتو افسانوي ستوری رابرټ رېډفورډ مړ شو
د امریکا د سینما نامتو افسانوي ستوری، د اسکار جایزې ګټونکی فلم جوړونکی او د خپلواکې سینما او چاپېریال ساتنې تکړه ملاتړی رابرټ رېډفورډ په ۸۹ کلنۍ کې مړ شو.
د امریکا د سینما نامتو افسانوي ستوری، د اسکار جایزې ګټونکی فلم جوړونکی او د خپلواکې سینما او چاپېریال ساتنې تکړه ملاتړی رابرټ رېډفورډ په ۸۹ کلنۍ کې مړ شو.
رېډفورډ د خپلې پیاوړې شخصیتي اغېز، وقار او د پردې پر مخ د اغېزناک حضور له لارې د نړۍوالو زړونه وګټل او د امریکایي سینما په یوه نه هېرېدونکي سمبول بدل شو. هغه د یادګاري رولونو په ترسره کولو سره لکه په «بوچ کسېډي او سانډنس کېډ» او «د ولسمشر ټول کسان» فلمونو کې نړۍوال شهرت ته ورسېد.
سربېره پر دې چې نوموړی یو تکړه لوبغاړی و، د فلم جوړونې په برخه کې یې هم ستره ونډه لرله. د هغه یوفلم چې «عام وګړي» نومېده د غوره فلم جوړونکي په توګه یې د اسکار جایزه هم ګټلې وه او «د هغې ترمنځ چې سیند بهېږي» فلم د هغه له نورو بریالیو اثارو څخه ګڼل کېږي.
رېډفورډ د هنر د ودې لپاره د ژورې مینې له امله د سانډنس بنسټ جوړ کړ؛ دا یوه غېرانتفاعي اداره ده چې د خپلواکې سینما او تیاتر ملاتړ کوي. د همدې بنسټ تر سیوري لاندې د سانډنس نړۍوال فلمي جشن د نویو فلم جوړونکو لپاره په نړۍ کې د اعتبار وړ او مهم بازار ګڼل کېږي.
له دې بوختیاوو سره-سره، نوموړی د چاپېریال یو ژمن فعال هم و. هغه په ۱۹۶۱کال کې د امریکا د یوټا ایالت غرونو ته کډه شو او لسګونه کاله یې د طبیعت د ساتنې لپاره هلې ځلې وکړې. د هغه هڅې د چاپېریال ساتنې په برخه کې د ډېرو فعالانو او سترو څېرو لپاره د الهامي سرچینه جوړه شوې ده.
رابرټ رېډفورډ د سینما په نړۍ کې یو تلپاتې نوم او د هنر او طبیعت د ملاتړ په ډګر کې یو پیاوړی غږ پاتې شو. د هغه میراث به د راتلونکو نسلونو لپاره د الهام یوه نه مړه کېدونکې سرچینه وي.
