د امریکا د بهرنیو چارو وزیر او د سوریې ولسمشر په نیویارک کې سره ولیدل

دواړو لوریو د کمرو مخې ته لاس ورکړ او د امریکايي چارواکو په وینا، د سوریې د سولې او ثبات د راتلونکي په اړه یې خبرې وکړې.
د راپورونو له مخې، احمد الشرع په دې لیدنه کې د سوریې پر وړاندې د بندیزونو د بشپړ له منځه وړلو غوښتنه وکړه، هغه بندیزونه چې د اوږدو کلونو لپاره یې د دې هېواد اقتصاد تر فشار لاندې راوستی دی.
واشنګټن ټینګار کړی، چې له دمشق سره هر ډول د اړیکو پرمختګ د بهرنیو ځواکونو په وتلو، د ایران د نفوذ په کمېدو او د سوریې د کیمیاوي وسلو د بشپړې له منځه وړلو په شرط دی.
دا په داسې حال کې ده، چې دا لومړی ځل دی چې د سوریې یو مشر له کلونو وروسته د ملګرو ملتونو د عمومي اسمبلۍ په غونډه کې ګډون کوي. په ۲۰۱۱ کال کې د سوریې د کورنۍ جګړې له پیل راهیسې د دې هېواد هېڅ ولسمشر یا هېڅ یوه لوړپوړي چارواکي د ملګرو ملتونو د عمومي اسمبلې په غونډه کې ګډون نه و کړی.