د تاجکستان ولسمشر امام علي رحمان د ملګرو ملتونو د عمومي مجمعې په وینا کې له نړۍوالې ټولنې وغوښتل، چې د افغانستان د وچکالۍ د ستونزې د حل او د دغه هېواد د ختیځ د وروستیو زلزلهځپلو د مرستې لپاره همکاري وکړي. نوموړي ټینګار وکړ، چې تاجکستان د دې بهیر په لړ کې د همکارۍ لپاره چمتو دی.
ښاغلي رحمان د سې شنبې په ورځ عمومي مجمعې ته په وینا کې وویل: «موږ نړۍوالې ټولنې ته بلنه ورکوو چې د بشردوستانه مرستو په رسولو په ځانګړي ډول هغو سیمو ته چې د وچکالۍ او سختې زلزلې له امله زیانمنې شوې دي، همکاري وکړي.»
هغه زیاته کړه، چې تاجکستان تل د ګاونډي هېواد افغانستان د سولې او ثبات، بشپړ امنیت او ټولنیز او اقتصادي پرمختګ پلوی دی.
د تاجکستان ولسمشر د خپلو خبرو په بلې برخه کې ترهګري، افراطیت، د وسلو او نشهيي توکو قاچاق او نور سرحدي سازمان شوي جرایم د نړۍوال امنیت پر وړاندې جدي ګواښ وباله او د دغو ګواښونو د مقابلې لپاره یې له نړۍوالو بنسټونو سره د نږدې همکارۍ ټینګار وکړ.
نوموړي د ملګرو ملتونو د ترهګرۍ ضد له دفتر څخه وغوښتل، ترڅو له ترهګرۍ سره د مبارزې په برخه کې له هېوادونو سره لا فعال رول ولوبوي.
