د افغانستان د خبریالانو مرکز او د رسنیو ملاتړ سازمان «امسو» په جلا خبرپاڼو کې د طالبانو له خوا د افغان خبریال مهدي انصاري څخه په زور اعتراف اخیستل غندلي دي. طالبانو د انصاري د جبري اعتراف ویډیو خپره کړې، چې پکې له بهر میشتو رسنیو سره د اړیکو او د طالبانو پر ضد تبلیغ یادونه کوي.
یادو بنسټونو د پنجشنبه په ورځ (د وږی ۱۰مه) په بېلابېلو خبرپاڼو کې ویلي: «دا اعتراف د طالبانو په زندان کې د روحي او فزيکې فشار لاندې اخیستل شوی او دا د خبریالانو د حقونو ښکاره نقص دی.»
د افغانستان د خبریالانو مرکز زیاته کړې، چې دا کار د طالبانو له خوا د رسنیو او خبریالانو د ځپلو د دوام یوه برخه ده.
همداراز د افغانستان د رسنیو مرکز د مهدی انصاري د روغتیايي حالت په اړه اندېښنه څرګنده کړې او د هغه د سمدستي ازادۍ غوښتنه یې کړې ده.
د افغان خبریالانو مرکز د مهدي انصاري محاکمه غیر عادلانه بللې او ټینګار یې کړی چې طالبان خبریالان د مدافع وکیل له شتون پرته محاکمه کوي او په زندان کې یې اچوي.
مهدی انصاري تېر کال د تلې په ۱۴مه نېټه د کابل دشت برچي سیمې څخه «د جلا وطنه رسنیو سره د همکارۍ» په تور نیول شوی و.
طالبانو تېر کال هغه ته د یونیم کال بند سرا اورلې وه.
په دې وروستیو کې د طالبانو استخباراتو د هغه د جبري اعتراف یوه ویډیو خپره کړه.
مهدي انصاري ته نږدې سرچینې وايي، چې د طالبانو په زندان کې د هغه فزیکي او رواني حالت ښه نه دی.
