د طالبانو د برېښنا شرکت وايي، په شمالي ولایتونو کې د تېرې شپې د زلزلې له امله له تاجکستان او ازبکستان څخه وارداتي برېښنا پرې شوې وه، خو نن مازدیګر مهال د تاجکستان وارداتي برېښنا بېرته له شبکې سره وصل شوې، خو لا تر اوسه د ازبکستان د ۲۲۰ کیلو ولټ انتقالي مزی نه دی نښلول شوی.
دغه شرکت د دوشنبې په ورځ (د لړم ۱۲مه) د یوې خبرپاڼې په خپرولو سره ویلي، د تاجکستان وارداتي برېښنا د مزو له بیا نښلول کېدو سره د کندوز، تخار او د بغلان د یو شمېر سیمو برېښنا تامین شوې ده.
د طالبانو د برېښنا شرکت رييس عبدالباري عمر بیا وايي، د دغه شرکت کارکوونکي لا تر اوسه هم پر دې نه دي بریالي شوي، چې د ازبکستان د ۲۲۰ کیلو ولټ برېښنا مزي ورغوي او په دې برخه کې یې د هېوادوالو د زغم غوښتنه کړې ده.
نوموړی زیاتوي: «د افغانستان برېښنا شرکت کارکوونکي ساحو کې په کار بوخت دي څو عمومي شبکه ژر نورماله کړي.»
د برېښنا شرکت زیاتوي، د هېواد په شمالي سیمو کې د تېرې شپې له زلزلې وروسته، د ازبکستان وارداتي برېښنا مزي په دوو ځایونو کې – له نايباباد څخه تر سمنګان او له خُلم څخه تر پلخمري پورې پرې شوي او له امله یې تر اوسه هم د کابل په ګډون بغلان، پروان، پنجشېر، کاپيسا، لوګر، پکتيا، غزني او ميدان وردګ ولایتونه د ازبکستان له وارداتي برېښنا بې برخې دي.
د یادونې وړ ده، چې د افغانستان تر نیمايي زیاته برېښنا وارداتي ده او ډېری یې هم له تاجکستان، ازبکستان، ترکمنستان او ایران څخه را واردېږي.
