د ایران بهرنیو چارو وزیر سید عباس عراقچي وایي، چې د افغانستان په شمالي برخو کې د زلزلې تکرار، چې د ګڼو خلکو د مرګژوبلې او پراخو مالي زیانونو لامل شوی، ایران یې«په ژوره توګه غمجن او خواشینی» کړی دی.
هغه پر ایکس خواله رسنۍ زیاته کړې: « ایران د افغانستان له ملت، او د قربانیانو له غمجنو کورنیو سره خپله خواخوږي څرګندوي، موږ به د اړتیا له مخې زلزلهځپلو سیمو ته بیړنۍ بشري مرستې واستوو.»
د ایران د بهرنیو چارو وزیر ټینګار کړی چې د دواړو ګاونډیو هېوادونو اړیکې د ورورۍ او انساني همکارۍ پر بنسټ ولاړې دي او تهران به د سختیو په وخت کې د افغانانو ترڅنګ ولاړ وي.
د یادونې وړ ده، چې د تېرې شپې زلزلې د افغانستان په شمال، په ځانګړي ډول بلخ او سمنګان ولایتونو کې خلکو ته درانده زیانونه اړولي دي.
د لومړنیو راپورونو له مخې، لږ تر لږه ۲۸تنه مړه او نږدې ۹۵۰تنه ټپیان شوي او لسګونه کورونه نړېدلي دي.
