د امریکا د کورني امنیت وزیره کریسټي نوم وايي، چې په نږدې یوه کال کې شاوخوا دوه میلیونه غېرقانوني کډوال له امریکا اېستل شوي یا یې دغه هېواد پرېښی دی. هغې وویل، چې د ټرمپ حکومت به «ډېر خلک خپلو کورونو ته واستوي.»
کریسټي نوم د چهارشنبې په ورځ (د لیندۍ ۱۲مه) د کابینې په ناسته کې وویل، چې د غېرقانوني کډوالۍ کمول د حکومت له اساسي لومړیتوبونو څخه دي او د کډوالۍ او ګمرک اداره لس زره نوي مامورین ګوماري، چې لسو ورځو کې به خپل کار پیل کړي.
ولسمشر ډونالډ ټرمپ د ۲۰۲۵ کال په جنوري کې واک ته له ستنېدو راهیسې د کډوالۍ سختې پالیسۍ پلي کړې دي، چې په دې پالیسۍ کې د غېرقانوني کډوالو د نیولو او اېستلو زیاتوالی، د پولو سخت کنټرول او د ۱۹ هېوادونو د وګړو په اړه د سفر بندیز پراخول شامل دي.
د سپینې ماڼۍ رسمي پاڼې د سې شنبې په ورځ د ډونالډ ټرمپ یو انځور خپور کړی، چې هغه د امریکا او مکسیکو د پولې دېوال ته نېږدې ولاړ دی او ویلي یې دي، چې د کډوالو پراخ اېستل دوام لري.
دوی لیکلي، له هغه وخت راهیسې چې بایډن «د سرحدي ناورین» واک ټرمپ ته وسپاره دوه میلیونه غېرقانوني کډوال له امریکا څخه اېستل شوي دي.
په ورته وخت کې ورکړل شوې شمېرې بیا له رسمي احصایو سره برابرې نه دي. د امریکا د کډوالۍ او ګمرک د ادارې د شمیرو پر بنسټ، تېر کال ۳۲۰ زره کسان اېستل شوي، چې یوه برخه یې د بایډن دورې پورې اړه لري. دغه ادارې همدارنګه ویلي، چې یوازې د اکټوبر او نومبر په میاشتو کې ۵۶ زره کسان اېستل شوي دي.
د کارپوهانو په وینا، د «دوو میلیونو» په شمېر کې هغه کسان شامل دي، چې پرته له رسمي اېستلو څخه په خپله خوښه له امریکا تللي دي.
له امریکا څخه د کډوالو د اېستلو په اړه بحث وروسته له هغه زیات شو، چې یو افغان د امریکا د ملي ګارډ پر دوو سرتېرو برید وکړ.
له دې پېښې وروسته ډونالډ ټرمپ د ټولو افغان کډوالو د دوسیو د پروسس بهیر وځنډاوه او زیاته یې کړه: «د هغو ټولو افغانانو دوسیې به بیا وڅېړل شي، چې په تېرو کلونو کې امریکا ته راغلي دي.
ټرمپ د افغانانو لپاره د ویزې صادرول هم د نامعلومې مودې پورې ځنډولي دي.
