د افغانستان د بهرنیو چارو پخواني وزیر محمد حنیف اتمر، په ایران کې د جنرال اکرامالدین سریع او د هغه د همکار د ترور په تړاو غبرګون ښودلی او له ایراني چارواکو یې د جدي او شفافو څېړنو غوښتنه کړې ده.
اتمر پر ایکس په یوه یادښت کې ویلي، چې د جنرال اکرامالدین او د هغه د ملګري ترور د کډوالۍ پر مهال او په داسې حالت کې چې بېدفاع وو، یو ځل بیا د افغانانو زړونه له غم او کرکې ډک کړل.
د هغه په وینا، د هغو کسانو وژل چې خپل ټول عمر یې د وطن د ازادۍ او د خلکو د تلپاتې ارزښتونو لپاره وقف کړی و، یو نهایت ناځوانمردانه عمل دی چې باید په کلکه وغندل شي او جدي تعقیب شي.
د بهرنیو چارو پخواني وزیر همداراز له ایراني چارواکو څخه غوښتنه کړې، چې د دې پېښې په اړه اړینې، رڼې او هر اړخیزې څېړنې وکړي او عاملین یې د قانون منګولو ته وسپاري.
نوموړي ټینګار کړی، چې د افغان مبارزینو او مخکښو څېرو پر وړاندې د ترهګریزو ګواښونو له زیاتېدو سره، باید د هغوی د امنیت لپاره جدي تدابیر نور هم پیاوړي شي.
