د امریکا ملي هوايي ادارې ناسا ویلي، د ۲۰۲۶ کال په لومړیو کې څلور ستور مزلي د سپوږمۍ پر لور لېږي. دغه ماموریت «ارټمېس ۲» نومول شوی دی. دغه ستور مزلي د امریکا د فلورېدا له کېنېډي فضايي مرکز څخه خپل سفر پیلوي او دا به د انسانانو لومړنی سفر وي چې د ځمکې له ټيټې سطحې ترسره کېږي.
د ناسا د معلوماتو لهمخې، دغه ستور مزلي به Space Launch System (SLS) له لارې د فلوریدا د کېنېډي فضايي مرکز څخه خپل سفر پيل کړي.
دغه ستور مزلي به د اوریون (Orion) فضايي بېړۍ په وسیله د ځمکې او سپوږمۍ ترمنځ شاوخوا لس ورځنی سفر ترسره کړي.
ناسا ویلي: «د دغه سفر لپاره د ۲۰۲۶ کال فبروري میاشت غوره شوې، خو دا نېټه ښايي د تخنیکي معایناتو، د اوریون بېړۍ د چمتووالي او د خوندیتوب وروستیو ارزونو لهمخې لږ مخکې یا وروسته شي».
په دې ماموریت کې به د ناسا درې امریکايي ستور مزلي ریډ ویسمین، ویکتور ګلاور او کرسټینا کوک او د کاناډا د فضايي ادارې ستورمزلی جرمي هینسن برخه ولري. دا به لومړی ځل وي، چې یو کاناډایي ستور مزلی د سپوږمۍ پر لور سفر کوي.
د دغه ماموریت موخه دا ده، چې په سپوږمۍ کې د انسانانو لپاره د ژوند احتمال وارزوي او د ناسا په وینا، دغه ارزونې د راتلونکو ماموریتونو لپاره ډېرې مهمې دي، په ځانګړي ډول د ارټمېس ۳ لپاره، چې غواړي دغه بهیر لاپسې پراخ کړي.
د فضايي چارو شنونکي دغه ماموریت د نوې فضايي دورې پیل بولي، چې موخه یې یوازې سپوږمۍ نه، بلکې په راتلونکي کې مریخ ته د انسانانو استول هم پهکې شامل ګڼي.
د یادونې وړ ده، چې تر دې مخکې دغه ډول سفر په ۱۹۷۲ کال کې د «اپولو» پروګرام په نوم ترسره شوی و.
